Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 160 Hüküm no: 163 Orijinal metin no: [31b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Osman’ın Âişe Hâtun bt. Abdullah’tan satın aldığı menzilin yarı hissesinin vekâleti olmadığı halde Nasuh Halîfe b. Mehmed tarafından Âişe Hâtun’a satıldığı, satışın iptali ve bedelinin ödenmesine dâir Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Düğmecizâde mahallesi sükkânından işbu râfi‘ü’l-kitâb Mehmed Beşe b. Osman nâm râcil meclis-i şer‘-i şerîf-i lâzımü’t-teşrîfde menzil-i câi’z-zikre vâzı‘atü’l-yed olan Âişe Hâtun bt. Abdullah’ı ihzâr mahzarında üzerine takrîr-i da‘vâ edip mezbûre Âişe târih-i kitâbdan mukaddem sene hamsîn ve elf Saferü’l-hayrın dördüncü günü mahalle-i mezbûrede vâki‘ bir tarafdan Mustafa Beşe mülkü ve bir tarafdan Şaban mülkü ve bir tarafdan Hasan mülkü ve bir tarafdan tarîk-i âm ile mahdûd olup bir bâb fevkānî ve bir bâb tahtânî beyti ve cüneyne ve kenîfi müştemil olan mülk menzilinin nısf-ı şâyi‘ini kâsid akçe zamânında bana dört bin akçeye bâtten bey‘ ve tesl[î]m ve ben dahi ber vech-i muharrer iştirâ ve tesellüm eyledikden sonra semen-i mezbûr dört [bin] akçeyi ahz u kabz edip târih-i mezbûrda medîne-i mezbûr[e]de hilâfete müvellâ olan Yahya Efendi el-Hasbî imzâsıyla mümzâ yedime hüccet-i şer‘iyye verdikden sonra semen-i mezbûr dört bin akçeyi mezbûre Âişe bana [i]krâz edip ben dahi istikrâz ve kabz eyledikden sonra menzil-i mezbûrun hüccetini meblağ-ı mezbûr mukābelesinde mersûme Âişe’ye rehin vaz‘ ve teslîm edip Azak seferine gittiğimde ben seferde iken izin ve icâzetim yok iken tarafımdan gāib ani’l-meclis olan Nasuh Halîfe b. Mehmed nâm kimesne fuzûlen vekîl olup vekâleten menzil-i mezbûrda olan nısf hisse-i şâyi‘amı merkūme Âişe Hâtun’a elli bir Muharremü’[l]-harâmı’nın yirmi üçüncü gününde dört bin mezbûrü’n-na‘t akçeye bey‘ eylemişdir suâl olunup menzil-i mezbûrda olan nısf hisse-i şâyi‘amdan kasr-ı yedine tenbîh olunmak matlûbumdur dedikde gıbbe’s-suâl cevâbında fi’l-vâki‘ müdde‘î-i mezbûr Mehmed Beşe sefere gittikde zimme[tin]de mukarrer olan dört bin akçem mukābelesinde hüccetini bana rehin vaz‘ eylediğinden sonra mezbûr Nasuh Halîfe’yi dahi tarafından menzil-i mezbûrda olan nısf hissesini bey‘a tevkîl eyleyip ol dahi vekâleten nısf hisse-i şâyi‘asını bana dört bin akçeye bey‘ eyledi deyû târih-i mezbûr ile müverraha ol târihde hilâfete müvellâ olan Ömer Efendi b. Sadi imzâsıyla mümzât ve hatmi ile mahtûme hüccet ibrâz eyledikde müdde‘î-i mezbûr Mehmed Beşe istintâk olundukda merkūme Âişe’nin cümle müdde‘âsını münkir olup istişhâd olundukda merkūme Âişe ityân-ı beyyineden izhâr-ı acz edip istihlâf eyledikde ol dahi alâ mâ hüve’l-mes’ûl half billâhi’l-aliyyi’l-azîm eylemeğin menzil-i mezbûr[da] olan nısf hisse-i şâyi‘adan merkūme Âişe kasr-ı yedine ve müdde‘î-i mezbûr Mehmed Beşe zimmetinde mütekarrir olan dört bin züyûf akçenin altından kıymeti olan altı altını merkūme Âişe’ye edâ ve teslîme tenbîh-i şer‘î olunmağın mâ vaka‘a bi’t-taleb ketb ve terkīm olundu. Tahrîren fi’l-yevmi’l-hâmis ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Halil b. Mehmed el-Müezzin, Mustafa Çelebi b. ( ) Kazganîzâde, Halil Çelebi b. Haydar, Hüseyin Çelebi b. Eyüb, Mehmed Çelebi b. İsmail, Mahmud Çelebi birâder, Zahrü’l-akrân Rıdvan Ağa b. Abdullah, Mustafa Çelebi b. Rıdvan Ağa, Ali b. Mustafa, Mustafa b. Mehmed, Mustafa b. Veli, İbrahim b. Mustafa ve gayruhüm [min]e’l-huzzâr