Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 169 Hüküm no: 174 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Yani’nin Dimitri’ye koyun sattığı ve bedelini Dimitri’ye olan borcu ile takas ettikleri Çoban tâifesinden Panayot v. Yani nâm zimmî meclis-i şer‘-i hatîr-i lâzımü’t-tevkīrde medîne-i Ebâ Eyyûb-i Ensârî -aleyhi rahmetü Rabbihi’l-Bârî- mahallâtından Otakçı mahallesinde sâkin işbu hâmilü’l-kitâb Dimitri v. Yorgi nâm zimmî muvâcehesinde bi’t-tav‘i’s-sâf ikrâr ve i‘tirâf edip işbu hâzır bi’l-meclis olan Hamadinos nâm zimmîye koyun bahâsından üç bin akçe deynim olmağla ben dahi mezbûr Dimitri’ye meblağ-ı mezbûru mezbûr Hamadinos’a ver demekle mezbûr Dimitri dahi emrim ile meblağ-ı mezbûr üç bin akçeyi mezbûr Hamadinos’a bi’t-tamâm edâ ve teslîm ve ol dahi ahz ve tesellüm edip hâlen mezbûr Dimitri meblağ-ı mezbûr üç bin akçeyi benden da‘vâ ve taleb etmekle ben dahi silk-i mülk-i sahîh ve sarîhimde münselik kırk re’s koyun her bir re’si yetmiş beşer akçeden üç bin olmak hesâbı üzre mezbûr Dimitri’ye bey‘ ve teslîm ve ol dahi vech-i muharrer üzre iştirâ ve tesellüm ettikden sonra semeni olan meblağ-ı mezbûr üç bin akçeyi benim mezbûr Dimitri’ye zimmetimde deynim olan üç bin akçe hakkına takās edip ol dahi mukāssa ve kabûl eyledi mârrü’z-zikr kırk re’s koyun mezbûr Dimitri’nin mülk-i müşterâsıdır dedikde mukırr-ı mezbûrun ber vech-i mübeyyen cârî ve sâdır olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe b. Mustafa mine’l-huddâm, Mustafa b. Veli mine’l-huddâm, İbrahim Çelebi b. Mustafa mine’l-huddâm, Hüseyin b. Ali mine’l-huddâm, Bayram Sofu mine’l-huddâm, Süleyman Baba [b.] Turgud ve gayruhüm mine’l-huzzâr