Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 170 Hüküm no: 175 Orijinal metin no: [34a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun bt. Abdullah ile kocası el-Hâc Atâ b. el-Hâc Mehmed’in muhâlaa ile boşandıkları Ebâ Eyyûb el-Ensârî -radiye anhu Rabbühü’l-Bârî- mahallâtından Otakçıbaşı mahallesinde sâkine Emine Hâtun bt. Abdullah nâm hâtun -tağyîr ve tahrîfden korunmuş olan- meclis-i şer‘-i şerîf ve mahfil-i dîn-i münîfde hâzır olup zevci râfi‘-i hâze’l-kitâb el-Hâc Atâ b. el-Hâc Mehmed nâm kimesne ile muhâla‘a olduğunu ikrâr ve i‘tirâf edip ol dahi onunla nikâhlarında ma‘kūdun aleyh olan kadri ve nisâbı bin dirhem ceyyid cedîd fıddî râyic fi’l-vakt olan mehr-i müecceli ile nafaka-i iddeti ve ilm-i şer‘î ile ma‘lûme olan me’ûnet-i süknâsı kendi üzerine olmak üzre muhâla‘a-i sahîha-i şer‘iyye ile muhâla‘a olmağın akd-i cedîd ve sadâk-ı müste’nef olmaksızın kendisine helâl olmamak üzre bâyin oldukdan sonra her biri âharın zimmetini umûmen ve husûsan hukūk-ı zevciyyete müte‘allik cemî‘ de‘âvî ve mütâlebât ve eymân ve muhâsamâtdan ibrâ-i âmm-ı kātı‘ü’n li’n-nizâ‘ ve râfi‘ün li’l-husûmet ile ibrâ etmeğin ikrâr-ı sahîh-i şer‘î ve i‘tirâf-ı sarîh-i mer‘î olduğu [kayd olundu]. Cerâ zâlike ve hurrire fi’l-yevmi’l-hâmis min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-a‘yân İbrahim Ağa b. Ali Çorbacı, zahrü’l-akrân Ali Bey b. Kemal, İbrahim Çelebi b. Mustafa min huddâm, Hüseyin b. Ali min huddâm, Mustafa Beşe b. Mustafa min huddâm, Ali Beşe b. Mustafa min huddâm, Ali Beşe b. Mustafa min huddâm, Mustafa Beşe b. Veli, Bayram Sofu min huddâm ve gayruhüm