Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 123 Hüküm no: 141 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçlu olarak ölen Drako’nun terekesinin satılarak borçlarının ödendiği Büyükada karyesinde mütemekkin iken bundan akdem düyûnu terekesinden ezyed olduğu hâlde hâlik olan Drako v. Hıristodolopos zimmînin vârisi zevce-i metrûkesi Toniçe bt. Hıristodolos Nasrâniye ile sulbî sagīr oğlu Dimitraki’ye münhasıra oldukdan sonra hâlik-i merkūmun terekesini bey‘a ve düyûn-ı müsbetesini edâya ve sagīr-i mezbûrun tesviye-i umûruna kıbel-i şer‘-i enverden bâ-hüccet-i şer‘iye vasiyy-i mansûbu olan zevce-i mesfûre kendü nefsinden asıl ve sagīr-i mezbûr tarafından vesâyeten vekîl olduğu şahsını ârifân Manolaki v. Dimitraki ve Yamandaki v. Pirafil zimmîler şehâdetleriyle sâbitü’l-vekâlesi olan Anaştaş v. Panayot zimmî meclis-i şer‘-i hatîrde zevce-i mesfûrenin li-ebeveyn er karındaşı işbu râfi‘ü’r-rakīm Panayot v. Hıristodolos zimmî muvâcehesinde bi’l-vekâle ikrâr ve takrîr-i kelâm edüp hâlik-i merkūmun ile’l-helâk yedinde mülkü olup ba‘de’l-helâk müvekkilem mesfûre Toyiçe’ye ve sagīr-i mezbûra ırsen isâbet ve intikāl eden karye-i mezbûrede vâki‘ bir tarafı Malamata ve Kanilo menzilleri ve bir tarafı diğer <> Malamata menzili ve bir tarafı tarîk-i âm ve tarîk-i hâs ile mahdûd fevkānî iki bâb oda ve dehliz ve kenîf ve tahtında bir bâb oda ve mahzen ve bir mikdâr avlu ve iki sokak kapısını müştemil mülk menzili iki yüz guruşa ve yine karye-i mezbûrede vâki‘ bir tarafı Aci Nikola menzili ve bir tarafı Yamandi dükkânı ve bir tarafı Panayotaki menzili ve bir tarafı tarîk-i âm ile mahdûd bir sofa ve bir mahzen ve bir mikdâr avlu ve kuyuyu müştemil mülk iki kepenek bakkāl dükkânı yüz on beş guruşa ve yine müvekkilem mesfûre ile sagīr-i mezbûrun ale’l-iştirâki’s-seviy yedlerinde mülkleri olup karye-i mezbûrede vâki‘ etrâf-ı erba‘ası Kayaoğlu ve Malamata ve Kanilo ve Aci Nikola menzilleri ve bahçesi ve tarîk-i hâs ile mahdûd ve Yamandi dükkânı ile mahdûd bir bâb mülk hamr mahzenini yüz on guruş ki cem‘an dört yüz yirmi beş guruşa hâlik-i merkūmun zarûret-i deyni içün bi’l-izni’ş-şer‘î tarafeynden îcâb ve kabûlü hâvî bey‘-i bâtt-ı sahîh-i şer‘î ile müşterî-i mezbûra dört yüz yirmi beş guruşa müvekkillem mesfûre asâleten ve vesâyeten bey‘ u teslîm ve temlîk eylediğinde ol dahi ber-vech-i muharrer iştirâ ve tesellüm ve temellük ve kabz [u] kabûl eylediğinden sonra semenleri olan meblağ-ı mezkûr dört yüz yirmi beş guruşu müvekkilem mesfûre zevci hâlik-i merkūmun zimmetinde vâcibü’l-edâ müşterî-i merkūma dört yüz yirmi beş guruş deyni olup deyn-i mezkûra bi’t-terâzî takās ve mahsûb ol dahi ber-vech-i muharrer mukāssa ve kabûl edüp fîmâ-ba‘d zikrleri mürûr eden menzilde ve dükkânda ve mahzende vechen mine’l-vücûh müvekkilem mesfûrenin ve sagīr-i mezbûrun kat‘â alâka ve medhalleri kalmayup müşterî-i mezbûrun mülk-i müşterâsı ve hakk-ı sırfı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min-Cemâziyelevvel li-sene selâse ve semânîn ve mi’ete ve elf. Şuhûdü’l-hâl: el-Hâc Mahmud Ağa, Nalband İbrahim Ağa, Ahmed Efendi, Hancı Ahmed Ağa. Aci Dimitraki v. Panayot, Mumbarcı Yorgi v. Nikola, Yamandi v. Panayot, Yanaki v. Panayot, Aleksi v. Yuvan, Şişman Andon v. [İlya] ve gayruhum.