Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 124 Hüküm no: 142 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya üzerine düzenlenecek sefer için gerekli olan askeri ve idari hazırlıkların yapılması Mefâhirü’l-kuzât ve’l-hükkâm me‘âdinü’l-fezâil ve’l-kelâm Kartal’dan Mudanya’ya varınca yol üzerinde vâki‘ kazâların kādıları ve nâibleri -zîde fazluhum- ve mefâhirü’l-emâsil ve’l-akrân bu husûsa bu def‘a hâssaten mübâşir ta‘yîn olunan hâlâ kalyonlar halîfe-i sânîsi Memiş ve ( ) ve tersâne-i âmirem tarafından memûr kılınan kalyon çavuşları ve kalyon ağaları -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki a‘dâ-yı dîn ü Devlet-i aliyyem olan Moskov keferesinin nakz-ı ahd ile hudûd-ı İslâmiyeye sû-i kasdlarından nâşî işbu sene-i mübârekede üzerlerine sefer-i hümâyûnum vâcib ve lâzım olup-bi-tevfîkihî subhânehû ve te‘âlâ- ber-vefk-i dilhâh-ı ahz-ı sâr-ı intikām içün berren nusreti’n-Nebeviyye hazret-i seyyidi’l-enbiyâ -aleyhi’s-salâtü ve’s-selâm- ile serdâr-ı ekremim ve umûmen ricâl-i Devlet-i aliyye ve kapı kullarım ve sâir tavâif-i askeriye ve bahren dahi techîz olunan donanma-i hümâyûnum kalyonlarıyla ince donanma sefîneleri memûr kılındığından başka tüccâr sefînelerinden dahi isticâr olunan on üç kıt‘a kalyon ve pergandi ve üç direkli sefîneleri dahi Deryâ Kapudanı İbrahim Paşa -dâmet-me‘âliyehû-nun ma‘iyyetinde olan donanma-i hümâyûnum sefâini ile hizmet-i lâzımede mevcûd bulunmak üzere techîzlerine irâde-i aliyyem ta‘alluk edüp sefâin-i mezkûre kapudanları dahi esfâr-ı sâbıkāda olageldiği üzere sâir sefâin kapudanları misillü beyne’l-akrân temyîz ve i‘tibâr kılındıklarından gayrı her birinin sefîneleri techîz içün kendü taraflarından tahrîr ve mevcûd edecekleri mellâh ve sâir neferâtlarından mâ‘adâ hîn-i muhârebede cenk ü harbe kādir kalyoncu neferâtı dahi mevcûd bulunmak üzere Âsitâne-i sa‘âdetimden ve mahâll-i sâireden tahrîr olunandan başka tekmîl-i lâzım içün bin nefere muhtâc ve el-hâletü hâzihi donanma-i hümâyûnumun vakt-i hareketi hulûl ile tiz elden ol mikdâr levendâtın mümkünü mertebesi mahâll-i merkūmdan ve ol havâlîlerden tedârük ve tahrîr ve celb ü tesyîrlerinden lâ-büd olmağın sâbıkda olduğu misillü Bahr-ı sefîd cânibine ihrâc olunan donanma-i hümâyûnum kalyonları levendâtı mevâciblerine adem-i sirâyet şartıyla her neferine kā’ide-i kadîmleri üzere tevcîh i‘tibârıyla ikişer kıst mevâcib verilmek üzere sâdır olan fermân-ı âlîşânım mûcebince hâlâ deryâ kapudanı paşa-i mûmâ-ileyh muvâcehesinde iftihârü’l-ümerâ-i ve’l-ekâbir bi’l-fi‘il başdefterdârım el-Hâc Ömer Vahid -dâme üluvvuhû- ma‘rifeti ve hâlâ tersâne-i âmirem emîni Sarim İbrahim -zîde uluvvuhû- ittifâkı ve kapudâne ve patrona ve riyâle-i hümâyûnum kapudanları ve liman reisleri ricâl-i tersâne-i âmiremin inzimâm-ı re’y ü inhâları ile lede’t-tedârük ol havâlîde esfâr-ı sâbıkā içün dahi mîrîden ikişer kıst mevâcibleri ile kalyoncu levendâtı tahrîri mesbûk olduğu cihetden tekmîl-i lâzım içün matlûb olan sâlifü’z-zikr bin nefer levendâtın lâzım gelen ikişer kıst mevâcibleri ba‘de’t-tahrîr Der-aliyyeme vusûllerinde birer kıstı kapudan-ı deryâ paşa-i mûmâ-ileyh ma‘rifetiyle verilmek şartıyla bu def‘a ber-vech-i peşîn verilecek birer kıst mevâcibleri mûmâ-ileyh Memiş -zîde kadruhû- mübâşereti ve kalyonlar çavuşları ve ağaları yedlerine teslîm ol havâlîye tesyîr olunup meblağ-ı mezbûr yarar kefilleri ile neferâta tevzî‘ ve kıbel-i şer‘den hüccet ahz olundukdan sonra neferât-ı mezbûre siz ki Kayseriyeli Mehmed ve Mehmed Usta ve Mahmud ve Kasım -zîde kadruhû-suz ma‘rifetinizle tedârük ve tahrîr ve tekmîline mübâşeret ve bir sâ‘at mukaddem tedârük, tersâne-i âmiremde mevcûd etdirilmek içün sana hitâben emr-i şerîfim sudûrunu paşa-i mûmâ-ileyh istid‘â ve ber-vech-i muharrer tekmîl-i lâzıme içün ol havâlîlerden neferât tedârüküne hâssaten memûr kılınmışsındır imdi işbu emr-i celîlü’l-kadrim tarafına vardığı gibi mübâşir-i mûmâ-ileyh ittifâkıyla matlûb olan neferâtı bir sâ‘at mukaddem tedârük ve Der-aliyyeme tesyîri senden matlûb-ı hümâyûnum olduğu ma‘lûmun olup ve cedîd tahrîr olunan kalyoncu neferâtına ibtidâ birer kıst mevâcib verilmek kānûn iken Der-aliyye’ye geldiklerinde kusûr birer kıst mevâcibleriyle me’külâtları içün iktizâ eden peksimed ve zahîre ve sâire kalyoncu neferâtı gibi verileceği cümleye ilân birle bir neferi alîl ve marîz olmayup hıdemât-ı sefâine vâkıf cenk [ve] âlet-i harbe ve darba kādir ve ârif tüvâna yiğitleri tergīb ve teşvîk eyleyerek ittihâb ve tedârük ve birer kıst mevâcibleri mübâşir-i mûmâ-ileyhe irsâl olunan meblağdan verilmek üzere yarar kefilleri ile neferâta tevzî‘ ve kıbel-i [34a] şer‘den hüccet ahz olundukdan sonra tahrîr ve ba‘de’t-tekmîl-i kusûr birer kıst mevâcibleri dahi Der-aliyyeme ba‘de’l-vusûl paşa-i mûmâ-ileyh ma‘rifetiyle tevzî‘ olunmak içün bir sâ‘at mukaddem Der-aliyyeme irsâl ve îsâle ihtimâm ve dikkat <> ve neferât-ı mezkûrenin tedârükünde iğrâz ile bu emr-i ehemmin te’hîrine bâ‘is olacak hâllerin vukū‘undan ziyâde tehâşî ve mücânebet eyleyesiz siz ki mevlânâ-yı mûmâ-ileyhimsiz bu husûs mûmâ-ileyhe ihâle olunduğuna binâen ber-vech-i meşrûh matlûb olan levendâtın tedârük ve irsâlinde kendüye mu‘âvenet ve müzâheret ve hilâfından tevakkī ve mübâ‘adet eyleyesiz ve siz ki mübâşir ve çavuşlar ve kalyon ağavâtı merkūmûnsuz sizlere tenbîh olunduğu üzere ol havâlîlerde bulunan neferâtı tergīb ve teşvîk ve mûmâ-ileyh ma‘rifetiyle ve kādıları ittifâkıyla ve ma‘rifet-i mübâşir ile birer kıst mevâcibleri yedinize verilen meblağ-ı mezbûrdan tevzî‘ ve kıbel-i şer‘den hüccet-i şer‘iye ahz eylediğinden sonra birer kıst mevâcibleri dahi Paşa-i mûmâ-ileyh muvâcehesinde verilmek içün mu‘accelen Der-aliyyeme irsâl ve bu husûsda mübâşeret nâmıyla ve sâir bahâne ile gerek mevâciblerinden bir akçe ketm ve kat‘ından ve gerek ahâlî-i vilâyetden bir nesne mutâlebesinden ihfâ ve mücânebet eylemeniz bâbında fermân-ı âlîşânım sâdır olmuşdur buyurdum ki hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzimü’l-imtisâlimin mazmûn-ı itâ‘at-makrûnu ile âmil olup hilâfından be-gāyet tehâşî ve mücânebet eyleyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis ışrîn Şevvâli’l-mükerrem li-sene isnâ ve semânîn ve mi’ete ve elf.