Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 173 Hüküm no: 180 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fıtık hastası olan Çoban Yuvan v. Todori’nin tabib Zogro v. Yani tarafından tedavi edileceği Çoban tâifesinden Yuvan v. Todori nâm zimmî meclis-i şer‘-i şerîf-i şâmihü’l-imâd ve mahfil-i dîn-i râsihü’l-evtâdda medîne-i Ebâ Eyyûb el-Ensârî -radiye anhu Rabbühü’l-Bârî-’de sâkin işbu râfi‘ü[’l-kitâb] Zogro v. Yani nâm tabîb muvâcehesinde bi’t-tav‘ ve’r-rızâ ikrâr ve i‘tirâf edip hâlen mübtelâ olduğum maraz-ı fıtığa ba‘zı eczâ-i hâdde-i nâfi‘a ile kat‘ ve iltiyâma ve mu‘âlece ve müdâvâya tabîb-i mezbûr Zogro’ya tîb-i hâtır ile nefsimi teslîm edip ol dahi mu‘âlece ve müdâvâta ta‘ahhüd eyledi eğer hîn-i mu‘âlecede bi-emrillâhi te‘âlâ tabîb-i mezbûrun yedinde fevt olursam veresemden ve sâir efrâd-ı âferîdeden bir ferd tabîb-i zimmîden dem ve diyetim da‘vâ ve taleb edip rencîde ve remîde eylemeyeler dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr Zogro bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ alâ vukū‘ihî gıbbe’t-taleb ketb olundu. Tahrîren fi’l-yevmi’s-sâdis min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe el-Muhzır, Mustafa Çelebi min huddâm, İbrahim Çelebi mine’l-huddâm, Hüseyin Çelebi mine’l-huddâm ve gayruhüm mine’l-hâzırîn