Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 173 Hüküm no: 179 Orijinal metin no: [34b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Preşkova’ya miras kalan evin İstoyani v. İstiko’ya satıldığı Vilâyet-i Rumeli’nde nefs-i Sofya mahallâtından el-Hâc Hamza mahallesi sükkânından Nikola v. Preşkova nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb İstoyani v. İstiko nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip mahalle-i merkūmede vâki‘ bir tarafı Koya v. ( ) menzili ve bir tarafı Takyeci Maşko v. ( ) menzili ve bir tarafı çorbacı Köse Ali Bey menzili ve bir tarafı abacı İstiko v. ( ) menzili ile mahdûd olup fevkānî ve tahtânî iki bâb beyti ve kenîfi ve eşcâr-ı müsmire ve gayr-ı müsmire bahçeyi ve havluyu müştemil menzil bundan akdem li ebeveyn kız kar[ın]daşım Angelino nâm Nasrâniyyenin mülkü [35a ] mülkü olup hâlike olmağın menzil-i merkūm sadrî oğlu ve hasren vârisi Hristo v. İstiko’ya şer‘an intikāl edip ve mezbûr Hristo dahi hâlik olup verâseti bana intikāl eylemiş idi el-hâletü hâzihî menzil-i mezbûru cemî‘ tevâbi‘ ve levâhık ve kâffe-i menâfi‘ ve merâfıkı ile mezbûr İstoyani’ye iki bin beş yüz cedîd ve ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve ol dahi vech-i muharrer üzre iştirâ ve tesellüm ettikden sonra semeni olan mezbûrü’n-na‘t iki bin beş yüz akçeyi müşterî-i merkūm yedinden bi’t-tamâm ve’l-kemâl ahz u kabz edip menzil-i mezbûru mahallinde müşterî-i merkūm İstoyani’yi kabza taslît eyledim ba‘de’l-yevm menzil-i sâlifü’z-zikr mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun ber vech-i muharrer cârî ve sâdır olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ vaka‘a ketb ü tahrîr olundu. Hurrire fi’l-yevmi’s-sâdis min Cumâdelûlâ li sene erba‘a ve hamsîn ve elf. Şuhûdü’l-hâl: Serdâr Hasan Çelebi b. Ali Çelebi, Yusuf Beşe b. ( ) er-Râcil, terzi Kiro v. Yuvan, Kostantin v. Çevacı, Yuvan v. Nikola ve gayruhüm mine’l-hâzırîn [Derkenâr:] Bu sûretin esahhı sâninci sûretdir. Gaflet olunmaya. [181 numaralı hüccette yeniden yazılmıştır.]