Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 217 Hüküm no: 237 Orijinal metin no: [45a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Armaga v. Yani ve Rizo v. Lambo’nun kasap dükkânında satıcıları olan Panayot v. Yani’den sattığı etin bedeli olan alacaklarını talep ettikleri Kasab tâifesinden işbu hâmilü’l-kitâb Armaga v. Yani ve Rizo v. Lambo nâm zimmîler medîne-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr kurbunda vâki‘ çarşıda vâki‘ kasab dükkânında müste’cirleri olan Panayot v. Yani nâm zimmîyi mahfil-i kazâya ihzâr ve mahzarında her birisi üzerine takrîr-i da‘vâ edip mezbûr Panayot satıcımız olmağın dükkân-ı mezbûrda ba‘de külli hesâb vezni ve mikdârı beynimizde ilm-i şer‘î ile ma‘lûm altı bin üç yüz akçelik lahm bey‘ edip hâlen semeni zimmetindedir suâl olunup alıverilmesi matlûbumdur dedikde gıbbe’s-suâl mezbûr Panayot cevâbında fi’l-hakīka müdde‘iyân-ı mezbûrân Armaga ve Rizo’nun cümle müdde‘âlarını ikrâr ve tasdîk ve vech-i muharrer üzre müste’cirleri olup taraflarından bey‘ eylediği lahm-ı megaz ve ganem semeninden zimmetinde altı bin üç yüz cedîd akçe lâzımü’l-edâ ve vâcibü’l-kazâ deyni olduğunu i‘tirâf ve tahkīk eylemeğin ber mûceb-i ikrârihî meblağ-ı mezbûrun edâsına tenbîh-i şer‘î birle işbu hurûf bi’t-taleb ketb ve terkīm olundu. Tahrîren fi’l-yevmi’s-sâmin aşer min Cumâdelûlâ li sene erba‘a ve hamsîn ve elf li sene 1054. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa min huddâm, İbrahim Beşe b. Veli el-Muhzır, Hasan b. Ali, Bayram Sofu, Mustafa Çelebi b. Veli ve gayruhüm mine’l-huzzâr