Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 217 Hüküm no: 236 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah’ın Mehmed b. Abdullah’a sattığı koyun bedelinden kalan alacağını talep ettiği Mahmiye-i İstanbul hısnı ebvâbından Edirnekapısı dâhilinde el-Hâc Muhyiddin mahallesinde sâkin işbu râfi‘ü’l-kitâb Ali Beşe b. Abdullah nâm kimesne çoban tâifesinden Mehmed b. Abdullah nâm kimesneyi mahfil-i kazâya ihzâr ve mahzarında üzerine takrîr-i da‘vâ edip bundan akdem mezbûr Mehmed, silk-i mülkümde münselik olan ağnâmdan beher re’s kuzusu ile yüz ellişer akçeye olmak üzre seksen üç re’s kuzusu ile koyunumu on bir bin altı yüz seksen akçeye iştirâ ve kabz eyledikden sonra semen-i mezbûrdan iki bin dört yüz akçesini yedinden alıp dokuz bin iki yüz seksen akçesi zimmetinde bana edâsı lâzım deyndir suâl olunup alıverilmesi matlûbumdur deyip gıbbe’s-suâl mezbûr Mehmed cevâbında fi’l-vâki‘ müdde‘î-i mezbûr Ali Beşe’nin cümle müdde‘âsını ikrâr ve tasdîk ve vech-i muharrer üzre mezbûr Ali Beşe’den iştirâ eylediği kuzusu ile seksen üç re’s koyun bahâsından zimmetinde dokuz bin iki yüz akçe lâzımü’l-edâ ve vâcibü’l-kazâ deyni olduğunu bi’l-muvâcehe i‘tirâf ve tahkīk eylemeğin ber mûceb-i ikrârihî meblağ-ı mezbûrun edâsına tenbîh-i şer‘î birle işbu hurûf bi’t-taleb ketb ve terkīm olundu. Tahrîren fi’l-yevmi’s-sânî ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Ahmed Beşe Çukadâr, Ali Beşe min huddâm, Mustafa Çelebi min huddâm, İbrahim Çelebi min huddâm, Hasan b. Ali, Bayram Sofu min huddâm ve gayruhüm