Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 219 Hüküm no: 239 Orijinal metin no: [45a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Minho’nun mülk bağını Tanaş v. Simo’ya sattığı ve bedelini tahsil ettiği Vilâyet-i Rumeli’nde Delvine sancağında Mazaraki kazâsına tâbi‘ Palaşifçe nâm karyede sâkin Yani v. Minho nâm zimmî meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâb Tanaş v. Simo nâm zimmî muvâcehesinde bi’t-tav‘i’s-sâf ikrâr ve i‘tirâf ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden karye-i mezbûre sınırı dâhilinde vâki‘ bir tarafdan müşterî-i mezbûr Tanaş bağı ve bir tarafdan Yani v. Andros bağı ve bir tarafdan Nikola v. Zino bağı ve bir tarafdan tarîk-i âm ile mahdûd ve tahmînen dört çapalık bir kıt‘a mülk bağımı cemî‘ tevâbi‘ ve levâhık ve kâffe-i menâfi‘ ve merâfıkı ile mezbûr Tanaş’a iki bin beş yüz seksen cedîd ve ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ettikden sonra semen-i mezbûrü’n-na‘t iki bin beş yüz seksen akçeyi yedinden bi’t-tamâm ve’l-kemâl ahz u kabz edip mebî‘-i mezbûru mahallinde kabza mezbûr Tanaş’ı taslît eyledim ba‘de’l-yevm mârrü’z-zikr bağ mezbûr Tanaş’ın mülk-i müşterâ-yı sahîh ve sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb ve imlâ olundu. Tahrîren fi’l-yevmi’r-râbi‘ ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Dimo v. Pervade, Yani v. Lika, Dimo v. Kaperde, Niko v. Marko, Todori v. Tanoş, Yani v. Yorkosta, Todori v. Kino, İstadi v. Nikola, Patko v. ( )