Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 226 Hüküm no: 250 Orijinal metin no: [46b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aydın Beşe b. Süleyman’ın evini merhûm Hasan Ağa Vakfı’na bey‘ bi’l-istiğlâl yoluyla sattığı Ebâ Eyyûb el-Ensârî -radiye anhu Rabbühü’l-Bârî- mahallâtından Çavuş Kasım mahallesinde sâkin olan Aydın Beşe b. Süleyman nâm kimesne -tağyîr ve tahrîfden korunmuş olan- meclis-i şer‘-i şerîf ve mahfil-i dîn-i münîfde ikrâr ve i‘tirâf edip hâmil-i hâze’l-kitâb mahmiye-i Galata’da saray-ı sultânî’de vâki‘ merhûm Hasan Ağa vakfı’na mütevellî olan fahrü’l-eimmeti’l-kirâm Mehmed Efendi b. Ali’ye bu akdin sudûruna değin kendisine âid mülkü olup yedinde ve taht-ı tasarrufunda bulunan Havâss-ı Aliyye kazâsı müzâfâtından Topçular karyesinde vâki‘ bir tarafdan Ormanlı Mustafa mülkü ve bir tarafdan Hamza Ağa bahçesi ve bir tarafdan merhûm Topçubaşı vakfı ve bir tarafdan tarîk-i âm ile mahdûd olan cemî‘ menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık kadri ve nisâbı üç yüz kıt‘a riyâlî guruş ta‘bîr olunur harbî sikke ile meskûk kıt‘a-i fıddî semen-i mu‘ayyen-i makbûza bey‘ etmeğin ol dahi vakf-ı mezbûr malı ile ondan istiğlâlen iştirâ eyleyip bey‘ ve iştirâ-i sahîhayn-i şer‘iyyeyn eyledikden sonra menzil-i mezbûru ba‘de’t-tahliyye ve’t-tekābuz işbu kitâbın zeylindeki târihden sene-i kâmile tamâmına değin bu müddet için mikdârı otuz yedi buçuk mezbûrü’n-na‘t riyâlî ücret-i mu‘ayyeneye mütevelli’l-mezbûrdan istîcâr eylemeğin ol dahi ona îcâr ettikde îcâr [47a ] ve istîcâr-ı sarîhayn-i mer‘iyyeyni ikrâr-ı sahîh-i şer‘î ve i‘tirâf-ı sarîh-i mer‘î ile ikrâr ve i‘tirâf eyledikden sonra men lehü’t-tasdîk kıbelinden ikrâr-ı mezbûru tasdîke mütevellî tarafından vekîl-i şer‘î olan câbi Receb Bey b. Mehmed nâm kimesne tarafından dahi vicâhen ve şifâhen tasdîk olundukdan sonra menzil-i mezbûrun derkine ve ücret-i merkūme ile meblağ-ı mezbûra Ferhad Beşe b. Ali ve Mustafa b. Ahmed el-Münâdî nâm kimesneler emr ve kabûlü hâviye kefâlet-i sahîha-i şer‘iyye ile [kefîl olduklarında kayd-ı sicil olundu]. Cerâ zâlike ve hurrire fi’l-yevmi’s-sâmin ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Hasan Ağa b. Abdülmennân el-Cündî, Abdurrahman Çelebi b. Ahmed el-Bevvâbü’s-sultânî, Ahmed Çelebi b. Hüseyin, Hasan Çelebi b. Bayezid, Mehmed Bey b. Mustafa el-Bevvâbü’s-sultânî, Mehmed Ağa b. Hüseyin Ser-habbâzân, Receb Bey b. Mehmed el-Bevvâbü’s-sultânî, Mehmed b. Mustafa el-Müezzin bi-sarâyi’l-mezbûr, Abdi Bey b. Mustafa el-Bevvâbü’s-sultânî, Mehmed Bey b. Hüseyin el-Bevvâbü’s-sultânî, Hüseyin Bey b. Abdullah el-Bevvâbü’s-sultânî, Ali Beşe b. Mustafa el-Muhzır, el-Hâc Ahmed Beşe er-Râcil Çukadâr ve gayruhüm