Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 226 Hüküm no: 249 Orijinal metin no: [46b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Amersine bt. Yorgaki’nin vekili olan annesi Matakşine tarafından Dimo v. Armağan ile nikâhlandıkları Mahmiye-i Kostantıniyye hısnı ebvâbından Cebealikapısı hâricinde vâki‘ ( ) mahallesinde sâkine Amersine bt. Yorgaki nâm Nasrâniyye tarafından akd-i âti’z-zikre vekîl olup vekâleti Andriye v. Panayot ve Yani v. Panço şehâdetleri ile mahzar-ı hasm-ı şer‘îde şer‘an sâbite olan vâlidesi Matakşine bt. Yorgaki meclis-i şer‘-i şerîf-i lâzımü’t-teşrîfde işbu râfi‘ü’l-kitâb Dimo v. Armağan nâm şemmâ‘ zimmî mahzarında bi’l-vekâle ikrâr-ı tâm ve bast-ı mukaddemât-ı merâm edip kızım müvekkilem merkūme Amersine’yi altı bin cedîd akçe mehr-i müeccel üzerine işbu meclisde hâzır şuhûd muvâcehesinde vekâletim hasebiyle merkūm Dimo’ya tezvîc eyledim dedikde merkūm Dimo dahi müvekkile-i merkūme Amersine’yi zikr olunan mehr-i müeccel üzerine tezevvüc ve kabûl eyledim deyû vekîl-i merkūmeyi kelimât-ı meşrûhasında bi’l-muvâcehe tasdîk eylemeğin işbu hurûf gıbbe’t-taleb ketb ve terkīm olundu. Hurrire fi’l-yevmi’l-hâmis ve’l-ışrîn min Cumâdelûlâ li sene 1054. Şuhûdü’l-hâl: El-Hâc Yusuf b. Abdullah, Ali Beşe min huddâm, Mustafa Beşe min huddâm, İbrahim Beşe min huddâm, Mustafa Çelebi min huddâm, Keşiş Yorga, Armağan v. Apostol ve gayruhüm mine’l-huzzâr