Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 231 Hüküm no: 257 Orijinal metin no: [48a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Selime Hâtun bt. Yusuf ile kocası Ahmed Halîfe b. İslâm’ın muhâlaa ile boşandıkları Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Baba Haydar mahallesinde sâkine Selime Hâtun bt. Yusuf nâm hâtun meclis-i şerîfde -Allahü te‘âlâ tağyîr ve tahrîfden korusun- hâzır olup zevci hâmil-i hâze’l-kitâb Ahmed Halîfe b. İslâm nâm kimesne ile muhâla‘a oldukda ol dahi onunla nikâhlarında ma‘kūdun aleyh olan kadri ve nisâbı dört bin beş yüz dirhem fıddî cedîd ceyyid râyic fi’l-vakt olan mehr-i müecceli ile nafaka-i iddeti ve me’ûnet-i süknâsı kendi üzerine olmak ve zevcine on kıt‘a esedî guruş ta‘bîr olunur harbî sikke ile meskûk kıt‘a-i fıddî vermek üzre muhâla‘a-i sahîha-i şer‘iyye ile muhâla‘a olmağın akd-i cedîd ve sadâk-ı müste’nef olmaksızın kendisine helâl olmamak üzre bâyin oldukdan sonra her biri âharın zimmetini cemî‘ de‘âvî ve mütâlebât ve eymân ve muhâsamâtdan umûmen ve hukūk-ı zevciyyete müte‘allik da‘vâdan husûsan ibrâ-i âmm-ı kātı‘ü’n li’n-nizâ‘ ve râfi‘ün li’l-husûmet ile ibrâ ettikde [kayd olundu]. Cerâ zâlike ve hurrire fi’l-yevmi’r-râbi‘ ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Eş-Şeyh Abdullah Efendi b. İsâ el-İmâm, Mustafa Çelebi b. Ali er-Râcil, Mehmed Halîfe b. ( ) el-Müezzin, Mehmed Halîfe b. ( ) el-Müezzin, Abdi Beşe b. Ali es-Serrâc, Mustafa Beşe b. Mehmed min huddâm, Ali Beşe b. Mustafa, Hüseyin Çelebi b. Ali, Baba Süleyman b. Turgud ve gayruhüm