Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 230 Hüküm no: 256 Orijinal metin no: [48a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Efendi b. Hüsrev’in evini, bahçesini ve bağını Mehmed Bey Evkâfı’na bey‘ bi’l-istiğlâl yoluyla sattığı Vilâyet-i Rumeli’nde nefs-i kasaba-i İstarova’da sâkin fahrü’l-kuzât Ali Efendi b. Hüsrev meclis-i şer‘-i şerîf-i enver ve mahfil-i dîn-i münîf-i ezherde medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Emir Buhârî mahallesinde Mehmed Bey evkāfı’na mütevellî olan işbu râfi‘ü’l-kitâb Mehmed Efendi b. Ramazan mahzarında ikrâr ve takrîr-i kelâm edip İstarova kazâsına tâbi‘ Jarvine nâm karyede vâki‘ lede’l-ahâlî ve’l-cîrân ma‘lûmü’l-hudûd çiftlik ta‘bîr olunur mülk menzilimi ve yine karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd tahmînen otuz dönüm eşcâr-ı müsmire ve gayr-ı müsmireyi muhtevî bahçemi ve yine karye-i mezbûrede vâki‘ lede’l-ahâlî ve’l-cîrân tahmînen on dönüm bir kıt‘a mülk bağımı cemî‘ tevâbi‘ ve levâhıkı ve kâffe-i menâfi‘ ve merâfıkı ile mütevellî-i merkūm Mehmed Efendi’ye tâmmü’l-vezn sahîhü’l-ayâr beş yüz riyâlî guruş-ı kebîre bi-tarîki’l-istiğlâli’ş-şer‘î bey‘ ve tesl[î]m edip ol dahi vech-i muharrer üzre vakf-ı merkūm malı ile iştirâ ve tesellüm ettikden sonra semeni olan meblağ-ı mezbûr beş yüz riyâlî guruşu mütevellî-i merkūm Mehmed Efendi yedinden bi’t-tamâm ve’l-kemâl ahz u kabz eylediğimden sonra yine zikr olunan menzili ve bahçeyi târih-i kitâbdan sene tamâmına değin mütevellî-i merkūm Mehmed Efendi’den beş bin fıddî râyic fi’l-vakt akçeye istîcâr ve tesellüm edip ol dahi vech-i muharrer üzre îcâr ve teslîm ettikden sonra Mehmed Efendi b. Mustafa ve Hüseyin Çelebi b. Abdullah nâm kimesneler mârrü’z-zikr menzil ve bahçe ve bağın derkine ve ücret-i merkūmesine ve meblağ-ı mezbûr beş yüz riyâlî guruş-ı kebîre emr ve kabûlü hâviye kefâlet-i sahîha-i şer‘iyye ile kefîl oldukdan sonra her biri âharın hîn-i mütâlebede ihzârına minvâl-i muharrer üzre kefîl bi’n-nefs olmağın işbu hurûf bi’t-taleb ketb ve imlâ olundu. Tahrîren fi’l-yevmi’r-râbi‘ ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Şeyh Hamza Efendi, Murtaza Efendi b. Mehmed el-İmâm, Mehmed Çelebi b. Hasan, Hüseyin b. Abdullah, Şeyh Çelebi b. Hüseyin, Hüseyin Çelebi b. Ali, Mustafa b. Mehmed, Mustafa Çelebi b. Hüseyin, Mustafa Çelebi b. Ömer, Ahmed Çelebi b. Mehmed, Bayram Halîfe b. Ebûbekir el-Müezzin, İbrahim Çelebi b. ( ) Papuççu, es-Seyyid Halil Efendi b. es-Seyyid Ahmed, Ali Halîfe b. ( ) eskici ve gayruhüm