Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 232 Hüküm no: 259 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara Mustafa Ağa’nın Suyolcu köyünde tarladaki kuyulardan çıkardığı suyu evine ulaştırmak için Sultan Bayezid Evkâfı suyoluna dâhil edeceği, suyun miktarının ölçülmesi için keşif yapıldığı [Derkenâr:] Mustafa Ağa suyu Mahmiye-i Kostantıniyye -humiyet ani’l-âfât ve’l-beliyye- mahallâtından Emir Buhârî kurbunda Hâce Veyis mahallesi sükkânından olup hâlen cenâb-ı rükn-i âlîşân ve sadr-ı âsaf-nişân düstûr-ı ma‘delet-nigâr ve müşîr-i ferîdûn-vakār, bercîs-i burc-ı ihtişâm, menât-ı makālîd-i umûr, müdebbir-i mühimmât-ı cumhûr, nâzım-ı âlem, medâr-ı mesâlih-i kâffe-i ümem, yemîn-i dîn ü devlet, emîn-i mülk-i memleket, mümehhid-i kavâ‘id-i şer‘-i mübîn, müeyyid-i de‘âim-i dîn-i metîn a‘nî düstûr-ı efham, vezîr-i a‘zam el-mahfûf bi-sunûfi eltâfi’l-meliki’l-mennân Mehmed Paşa -lâ zâlet âyâtü celâlihî fî sahâifi’l-eyyâm- hazretlerinin muhzırbaşılığı hizmeti ile kâmyâb olan kıdvet-i ashâbü’ş-şerefi’ş-şâmih, umdet-i erbâbü’l-mecdi’r-râsih, sâhibü’l-izzi ve’l-ihtirâm, sâcid-i ezyâlü’l-mecdi ve’l-ihtişâm işbu kitâb-ı sedâd-intisâbın hâfızı olan Kara Mustafa Ağa hazretleri taraf-ı izzet şereflerinden husûs-ı âti’l-beyâna vekîl olup vekâleti bimâ hüve tarîku’n-nehci’ş-şer‘î şer‘an sâbite olan fahrü’l-emâcid ve’l-ekârim Mustafa Ağa b. Hasan el-Cündî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda bi’l-vekâle takrîr-i kelâm ve bast-ı mukaddemât-ı merâm edip müvekkilim mûmâ-ileyh -esbağallâhu ni‘amehû aleyh- mahalle-i mezbûrede vâki‘ menzilinde icrâ için Havâss-ı Aliyye kazâsına tâbi‘ Suyolcu köyü demekle ma‘rûf karye mukābilinde merhûm ve mağfûrun-leh Sultan Bayezid Hân -aleyhi’r-rahmetü ve’l-gufrân- hazretlerinin mahmiye-i mezbûrede olan evkāf-ı bârrelerine icrâ eyledikleri mâ-i kesîrü’n-nümânın mâ fevkinde vâki‘ lede’l-ahâlî ve’l-cîrân ta‘rîf ve tavsîfden müstağnî Dimitraki nâm zimmî tasarrufunda olan tarla içinde hafr ile âbâr-ı müteferrikadan kendi malıyla cem‘ eylediği mâ-i cârîyi menba‘ından izn-i mütevellî ile merhûm-ı müşârün-ileyh hazretlerinin su yolu mecrâsına ber vech-i âdet-i me’lûfe-i kadîme idhâl ve ilhâk ve yine mahmiye-i merkūmede murâd eylediği yerde ifrâz için bundan akdem mâ-i mezbûru kable’l-idhâl cânib-i şer‘den keşf ve mu‘âyene ve vezn ve takdîr olunmak iltimâs olundukda cânib-i şer‘den Receb Efendi ol dahi bundan [akdem] su yolu nâzırı olan umdetü’l-emâcid ve’l-ekârim Hasan Ağa b. Abdüddâim tarafından vekîl olup hâssa su yolcularından el-Hâc Osman b. Mustafa ve el-Hâc Kurd ve sâir müslimîn ile mahall-i ma‘hûda varıp müşâhede ve mu‘tâd-ı kadîm üzre vezn ve takdîr eylediklerinde zikr olunan mâ-i mezbûru bir masura vezn ve takdîr olunup sâlifü’z-zikr Sultan Bayezid Hân hazretlerinin su yolu mecrâsına idhâl olunduğunu keşf ve mu‘âyene eylemişlerdi lâkin sâbıku’z-zikr hâssa su yolu nâzırı nezâretinden ma‘zûl yerine umdetü’l-emâcid ve’l-ekârim zübdetü’l-efâhim ve’l-e‘âzım Ali Ağa b. Yunus nâzır olduğundan mâ‘adâ zamân-ı eyyâm mehcûr olup sular noksan-pezîr olmağın bir dahi mâ-i mezbûrun üzerine varılıp keşf ve mu‘âyene ve vezn ve takdîr olunmak matlûbumdur dedikde cânib-i şer‘-i [ka]vîmden mevlânâ el-Hâc Ali Efendi irsâl olunup ol dahi sâlifü’z-zikr su yolu nâzırı Ali Ağa ve zeyl-i kitâbda mastûrü’l-esâmî olan müslimîn ile üzerine varıp müşâhede eylediklerinde mâ-i mezbûru mukaddemâ vezn ve takdîr olunduğu üzre bir masura su bulup buçuk masurasın cânib-i vakfa hakk-ı mecrâ ve mürûr için ibkā edip ve buçuk masurasını mûmâ-ileyh Mustafa Ağa murâd eylediği mahalden ifrâz edip mârrü’z-zikr menziline icrâya izin ve icâzetlerini mevlânâ-yı mezbûr mahallinde ketb ve terkīm, ba‘dehû gelip ihbâr ve takrîr eylemeğin mâ hüve’l-vâki‘ alâ vukū‘ihî bi’t-taleb ketb ve terkīm olundu. Hurrire fi’l-yevmi’t-tâsi‘ ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: El-Hâc Ahmed b. Ömer Suyolcu, Osman b. Murtaza Suyolcu, el-Hâc Ali b. Mehmed Suyolcu, Mehmed Bey b. Ali el-Cündî, Yusuf b. Hüseyin er-Râcil, Halil Çelebi er-Râcil, İbrahim Çelebi b. Mustafa Ağa el-Vekîl, Hüseyin Çelebi b. Ali el-Muhzır, Hasan b. Ali, Halil Çelebi b. Ahmed, Rıdvan b. Abdullah, Ali b. Abdullah, Şaban [b.] Ahmed er-Râcil ve gayruhüm mine’l-huzzâr