Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 234 Hüküm no: 260 Orijinal metin no: [48b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Berteme v. Andon’un mirasçılarının kendilerine intikal eden mülk evi Domaniko v. Andon’a sattıkları Kazâ-i Havâss-ı Aliyye -humiyet ani’l-âfât ve’l-beliyye- tevâbi‘inden Orta Belgrad nâm karyede sâkin iken bundan akdem hâlik olan Berteme v. Andon nâm zimmînin verâseti sulbî kebîr oğulları Lopizo v. Nikorzo ile sulbiye kebîre kızları Kokona ve Sultana’ya münhasıra olduğu şer‘an mütehakkik oldukdan sonra mezbûr Nikorzo kendi tarafından asâleten ve karındaşı mezbûr Lopizo tarafından husûs-ı âti’l-beyâna vekîl olup hasm-ı şer‘î-i câhid mahzarında Kosta v. Niko ve Andon v. Körih şehâdetleri ile vekâleti şer‘an sâbite oldukdan sonra vekâleten ve mezbûre Sultana dahi kezâlik kendi tarafından asâleten ve kız karındaşı mezbûre Kokona tarafından vech-i âtî üzre vekîl olup zimmiyân-ı mezbûrân şehâdetleriyle şer‘an vekâleti sâbite olundukda vekâleten meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâb Domaniko v. Andon nâm zimmî mahzarında her biri asâleten ve vekâleten ikrâr ve takrîr-i kelâm edip karye-i mezbûrede vâki‘ bir tarafdan Matika v. Andon mülkü ve bir tarafdan İstefani veresesi mülkü ve bir tarafdan tarîk-i hâs ve bir tarafı tarîk-i âm ile mahdûd bir bâb tahtânî beyti ve önünde arsa-i hâliyeyi ve müşterek su kuyusunu ve hizâsında iki bâb tahtânî odaları ve önünde arsayı müştemil babamız hâlik-i mezbûrdan müntakil ve mevrûs mülk menzilimizi cemî‘ tevâbi‘ ve levâhıkı ve kâffe-i menâfi‘ ve merâfıkı ile mersûm Domaniko’ya yüz doksan kıt‘a riyâlî guruşa tarafeynden îcâb ve kabûlü hâvî bey‘-i kat‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semeni olan meblağ-ı mezbûrü’n-na‘t yüz doksan kıt‘a riyâlî guruşu yedinden bi’t-tamâm ve’l-kemâl ahz u kabz eyledik, ba‘de’l-yevm mârrü’z-zikr menzil mesfûr Domaniko’nun mülk-i müşterâ-yı sahîh ve sarîhidir keyfe mâ yeşâ’ ve yahtâr mutasarrıf olsun dediklerinde mukırrân-ı mezbûrânın asâleten ve vekâleten cârî ve sâdır olan ikrâr ve takrîrlerini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve terkīm olundu. Tahrîren fi’l-yevmi’s-sâdis ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Ahmed Beşe b. Abdullah, Ali b. Şaban, Ali Beşe b. Abdullah, Bâli Beşe b. İzzetüllah, Seyyid Süleyman b. Seyyid Ahmed, Şahbaz b. Abdullah, Ali b. Mustafa, Ahmed Beşe Çukadâr, Panayot v. Minho, İstefani, Kosta v. Niko, Andon v. Lorih ve gayruhüm