Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 254 Hüküm no: 272 Orijinal metin no: [34a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rizo v. Yani’nin kasap dükkânında çalışırken ölen Minho’ya ücretini tam olarak ödediği Efendi hazretleri imzâsıyla Mahmiye-i İstanbul’da kasab tâifesinden olup bundan akdem mürd olan Minho v. ( ) nâm zimmînin evlâd-ı sıgārının vasîleri ve ammileri Angeli nâm zimmî dîvân-ı eyvân-ı adâlet-ünvânda ma‘kūd meclis-i şer‘-i hatîr-i lâzımü’t-tevkīrde tâife-i mezbûreden işbu bâ‘isü’s-sifr Rizo v. Yani nâm zimmî muvâcehesinde üzerine bi’l-vesâye da‘vâ edip bundan akdem mezbûr Rizo mahmiye-i mezbûrede Büyük Karaman kurbunda vâki‘ kasab dükkânında kanadarlık hizmetini edâ etmek üzre mürd-i mezbûru hayâtında beher yevm otuz akçe ücret ile istîcâr ol dahi nefsini ba‘de’l-îcâr on üç buçuk sene mezbûr Rizo’ya [34b] hizmet edip on senede ücretini külle yevm istîfâ ve kabz eyleyip üç buçuk senede müctemi‘ ve müstahak olduğu otuz yedi bin sekiz yüz akçeyi kable’l-ahz mürd olmağla meblağ-ı mezbûr irsen evlâd-ı sıgārına intikāl etmeğin hâlâ vesâyetim hasebiyle ol meblağı mezbûr Rizo’dan taleb ederim suâl olunsun dedikde gıbbe’s-suâl mezbûr Rizo cevâbında fi’l-vâki‘ zikr olunan dükkânda kanadarlık hizmetimi edâ etmek üzre mürd-i mezbûr Minho’yu beher yevm otuz akçe ücret ile istîcâr edip ol dahi nefsini îcâr eylediğinden sonra on üç sene zikr olunan hizmetimi edâ edip sene-i mezbûrede ücret-i merkūmesini beher yevm benden alıp kabz edip zimmetimde bir akçe hakkı bâkī kalmayıp hattâ mürd-i mezbûr târih-i kitâbdan iki buçuk ay mukaddem kaziyye vech-i muharrer üzre olduğunu mahzar-ı müslimînde ikrâr ve i‘tirâf etmişidi deyicek gıbbe’l-istintâk ve’l-inkâr mezbûr Rizo’dan takrîrine muvâfıka beyyine taleb olundukda udûl-i müslimînden olup mahmiye-i mahkiyede Hoşkadem mahallesinde sâkin Mustafa b. Ali ve Molla Hüsrev mahallesinde sâkin Mehmed b. Musli ve Bakkalzâde odalarından birinde sâkin Osman b. Şaban nâm kimesneler li ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-hakīka mürd-i mezbûr Minho hayâtında târih-i mezbûrda bizim huzûrumuzda mezbûr Rizo’ya zikr olunan dükkân[da] kanadarlık hizmetini edâ etmek üzre beher yevm otuzar akçe ücret ile nefsimi ba‘de’l-îcâr ve’l-istîcâr on üç buçuk sene ol hizmeti edâ edip sene-i mezbûrede ücret-i merkūmemi külle yevm yedinden alıp kabz eyledim min ba‘d ol senelerde ücretimden mezbûr Rizo zimmetinde bir akçe hakkım yokdur deyû ikrâr ve i‘tirâf edip bizi işhâd eyledi bu husûsa şahîdleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince vasiyy-i mezbûr ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’l-hâmis aşer min Cumâdelâhire li sene seb‘a ve seb‘în ve elf. Şuhûdü’l-hâl: Fazlullah Ağa, Hasan Çelebi b. Veli, Mustafa b. ( ), Mustafa Beşe b. ( ), Şaban Ağa b. ( ), Mehmed Çelebi b. Yusuf, Mehmed Çelebi b. Abdurrahman, İbrahim Çelebi, Mehmed Çelebi b. ( ) Kethüdâ-yı muhzırân, İbrahim Çelebi b. Mehmed.