Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 253 Hüküm no: 285 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merkez Muslihiddin Efendi Vakfı’na ait hamamın harap durumda olan yerlerinin tamiri için mütevellî Şeyh Ali Efendi b. Nasuh Efendi’ye izin verildiği Mahmiye-i İstanbul hısnı ebvâbından Yenikapı hâricinde vâki‘ merhûm ve mağfûrun-leh Merkez Muslihiddin vakfı’na mütevellî olan zîver-i ilm ve salâh ile ârâste ve hulbe-i zühd ve felâh ile pîrâste zahrü’l-vâsılîn eş-Şeyh Ali Efendi b. el-merhûm Nasuh Efendi meclis-i şer‘-i hatîr-i lâzımü’t-tevkīr ve’t-teşrîfde takrîr-i kelâm edip vakf-ı mezbûrdan olup mahalle-i mezbûrede vâki‘ vâkıf-ı mezbûra intimâ ile tahdîd ve tavsîfden müstağnî olan çifte hamamın kubbeleri üzerleri ve merdân ve zenân camekânlarının ba‘zı mevzi‘i mürûr-ı eyyâm ile harâba müşrif olup ta‘mîre muhtâc olmuşdur savb-ı şer‘den üzerine varılıp ba‘de’l-keşf ve’l-mu‘âyene ta‘mîrine izin verilmek matlûbumdur dedikde kıbel-i şer‘den mevlânâ el-Hâc Ali Efendi irsâl olunup ol dahi hâssa mi‘mârlardan Üstâd el-Hâc Hasan b. Ömer ve zeyl-i kitâbda mastûrü’l-esâmî olan müslimîn ile mahall-i mezbûra varılıp keşf ve mu‘âyene ve müşâhede ettiklerinde fi’l-vâki‘ hamam-ı mezkûrun sagīr ve kebîr ( ) aded kubbeleri üzerlerinin kireç ve horasan ile olan binâsı ve soğuk su hazîne üzerinin kiremidi ve dolap ve külhan üzerlerinin câ-be-câ kiremidleri harâba müşrif olup ta‘mîre muhtâc olmuşdur deyû mi‘mâr-ı mezbûr ihbâr edip icmâ‘ ve ittifâk ettiklerini mezkûr Ali Efendi müşârün-ileyh eş-Şeyh Ali Efendi mahzarında tahrîr edip ba‘dehû gelip meclis-i şer‘de inhâ ve takrîr ettikden sonra sâlifü’z-zikr hamamın vech-i meşrûh üzre ( ) aded kubbeleri üzerlerine ve mevâzi‘-i mezkûrenin ta‘mîrine eş-Şeyh Ali Efendi’ye izin birle mâ vaka‘a bi’t-taleb ketb ve terkīm olundu. Tahrîren fi’l-yevmi’t-tâsi‘ ve’l-ışrîn min Cumâdelûlâ li sene 1054. Şuhûdü’l-hâl: Es-Sâbıkūn