Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 252 Hüküm no: 284 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mütevellî tarafından tamir ettirilen Merkez Muslihiddin Efendi Vakfı’na ait hamamın keşfi ve mâliyetinin belirlenmesi Mahmiye-i Kostantıniyye hısnı ebvâbından Yenikapı hâricinde vâki‘ merhûm ve mağfûrun-leh Merkez Muslihiddin Efendi vakfı’na mütevellî olan kıdvetü’s-sulehâi’s-sâlikîn umdetü’l-etkıyâi’z-zâhidîn mefharü’ş-şuyûh eş-Şeyh Ali Efendi b. el-merhûm Nasuh Efendi meclis-i şer‘-i şerîf-i enver ve mahfil-i dîn-i münîf-i ezherde takrîr-i kelâm ve ta‘bîr ani’l-merâm edip vakf-ı mezbûrdan olup mahalle-i mezbûrede vâki‘ vâkıf-ı mezbûra intimâ ile tahdîd ve tavsîfden müstağnî çifte hamamdan ricâle mahsûs olan hamamın camekânı harâba müşrif olmağla izn-i şer‘î ile vakf-ı mezbûr malından tevliyyetim hasebiyle târih-i kitâbdan bir sene mukaddem ta‘mîr ve termîm etmişidim, savb-ı şer‘den üzerine varılıp müceddeden ve muhdes-i mezkûr camekânın tavanı ve sakfının ve dolap ferşinin ta‘mîr ve ebniyesi kıymetinin mertebe-i tahammülü tahmîn-i sahîh ile tahmîn ve takvîm olunmak matlûbumdur dedikde kıbel-i şer‘-i kavîmden mevlânâ el-Hâc Ali Efendi irsâl olunup ol dahi hâssa mi‘mârlardan Üstâd el-Hâc Hasan b. Ömer ve zeyl-i sütûrda mastûrü’l-esâmî olan bî-garaz müslimîn ile mahall-i ma‘hûda varıp keşf ve müşâhede ve mesâha ettiklerinde fi’l-hakīka zikr olunan camekânın bennâ zirâ‘ı ile tûlen ve arzan bi-hesâb-ı şatrancî altmış zirâ‘ sakfının beher zirâ‘ı kırkar akçeden iki bin dört yüz akçe ve bi-hesâb-ı mezkûr zikr olunan camekânın kırk zirâ‘ Bağdâdî tavanının her zirâ‘ı otuzar akçeden bin iki yüz akçe ve zikr olunan camekânın kubbesi ortasında vâki‘ bacasına maktû‘an beş yüz akçe ve mârrü’z-zikr camekânın kireç ve badanasına maktû‘an üç yüz altmış akçe ve kırmızı aşı boyasına üç yüz akçe ve mârrü’l-vasf camekânın yüz yirmi zirâ‘ ferşi meremmâtının her zirâ‘ı üçer akçeden üç yüz altmış akçe ve iki aded dolap meremmâtına yüz akçe ve sâir meremmâtına dört yüz akçe ki cem‘an ricâle mahsûs olan hamam camekânının ta‘mîr ve termîmi ancak beş bin altı yüz yirmi akçeye tahammülü vardır, noksan ile olmak mümkün değildir deyû ittifâk ettiklerinde vâki‘ hâli mevlânâ-yı mezbûr mahallinde tahrîr, ba‘dehû gelip meclis-i şer‘de alâ vukū‘ihî inhâ ve takrîr ettikden sonra mütevellî-i müşârün-ileyh eş-Şeyh Ali Efendi’nin mâl-ı vakıfdan ebniye-i mezbûreye vech-i muharrer üzre beş bin altı yüz yirmi akçe sarf ettiği mübeyyen olmağın mâ vaka‘a bi’t-taleb ketb olundu. Hurrire fî selhi Cumâdelûlâ li sene erba‘a ve hamsîn ve elf. Şuhûdü’l-hâl: Hasan Efendi b. Hüseyin el-Müderris, Mustafa b. Ahmed el-İmâm, Mahmud Çelebi b. Hüseyin el-Müezzin, Derviş Mehmed b. Mustafa el-Mevlevî, Şaban b. Receb er-Râcil, Mustafa Beşe er-Râcil, Ali Çelebi b. Abdullah, Hüseyin Dede b. İsmail, İbrahim Çelebi el-Hammâmî, Nâtır Mustafa, Ali Beşe b. Mustafa min huddâm ve gayruhüm mine’l-hâzırîn