Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 254 Hüküm no: 287 Orijinal metin no: [53a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Mihal’in mülk bağını Nikola v. Yorgi’ye sattığı Vilâyet-i Rumeli’nde Gerbeniş kazâsına tâbi‘ Çermehorya nâm karyeden Nikola v. Mihal nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Nikola v. Yorgi nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre kurbunda Çeperne nâm mevzi‘de vâki‘ bir tarafdan Yani v. Laho bağına ve bir tarafdan müşterî-i mezbûr Nikola bağına ve bir tarafdan vâdi ve bir tarafda[n] tarîk-i âm ile mahdûd tahmînen üç çapalık bir kıt‘a mülk bağımı cümle tevâbi‘ ve levâhıkı ve âmme-i menâfi‘ ve merâfıkı ile mezbûr Nikola’ya bin fıddî cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ettikden sonra semen-i mezbûrü’n-na‘t bin akçeyi yedinden bi’t-tamâm ahz u kabz edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm zikr olunan bağ merkūm Nikola’nın mülk-i müşterâ-yı sahîh ve sarîhidir keyfe mâ yeşâ’ mutasarrıf olsun dedikde mukırr-ı mezbûrun vech-i muharrer üzre cârî ve sâdır olan ikrârını el-mukarru lehü’l-mezbûr vicâhen ve şifâhen tasdîk ve tahkīk [etmeğin] mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis min Cumâdelâhire li sene erba‘a ve hamsîn ve elf. Şuhûdü’l-hâl: Yani v. Todori, Yani v. Torot?, Mihal v. Riso, Yani v. Kosta ve huddâmü’l-mahkeme ve gayruhüm