Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 254 Hüküm no: 288 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kenan b. Abdullah’ın evini Şeyhülislâm Ebû Said Efendi’ye sattığı Kazâ-i Havâss-ı Aliyye müzâfâtından Terkos nâhiyesine tâbi‘ Azadlı nâm karyede sâkin Kenan b. Abdullah nâm kimesne meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızı mesned-nişîn-i sadr-ı fetvâ olan a‘lemü’l-ulemâi’l-izâm efdalü’l-fuzalâi’l-fihâm hulefâi’l-e‘âlî ve’l-ekâbir vârisü’l-me‘âlî kâbiren an kâbir zü’l-hasebi’z-zâhir ve’n-nesebi’t-tâhir el-müstağnî zâtühü’ş-şerîf ani’l-elkāb beli’l-elkābü yeftahiru bi-zâlike’l-cenâb a‘nî bihî Hazret-i Ebû Said Efendi taraf-ı izzet şereflerinden ikrâr-ı âti’l-beyânı tasdîke vekîl olup hasm-ı şer‘î-i câhid mahzarında bimâ hüve nehcü’s-sübût şer‘an vekâleti sâbite olan zahrü’l-a‘yân Abdi Çelebi b. Rüstem mahzarında bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkden karye-i mezbûrede vâki‘ iki tarafdan müvekkil-i müşârün-ileyh Efendi hazretleri mülklerine ve bir tarafdan Ali Beşe b. Abdullah mülküne ve bir tarafdan tarîk-i âma müntehî bir fevkānî ve bir tahtânî beyti ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire muhavvatayı müştemil mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile müşârün-ileyh Ebû Said Efendi hazretlerine sekiz bin fıddî cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm menzil-i mahdûd-ı mezkûr müşârün-ileyh Efendi hazretlerinin mülk-i müşterâ-yı sarîhleridir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun ber vech-i muharrer cârî ve sâdır olan ikrâr ve takrîrini vekîl-i mezbûr Abdi Çelebi bi’l-muvâcehe tasdîk ve bi’l-müşâfehe tahkīk eylemeğin işbu hurûf mâ vaka‘a ketb ve terkīm olundu. Tahrîren fi’l-yevmi’r-râbi‘ min Cumâdelâhire li sene erba‘a ve hamsîn ve elf. Şuhûdü’l-hâl: Ahmed Efendi b. Mahmud el-Bağdâdî, Mehmed Efendi b. Abdülhalim el-Müderris, Davud Çelebi b. Ahmed el-Müderris, Bâli Efendi b. Veli el-Kadı, Musa Bey b. Veli ve gayruhüm mine’l-huzzâr