Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 256 Hüküm no: 290 Orijinal metin no: [53b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Apostol’ün Panayot v. Paros’a çobanlık yaptığı ve ücretini talep ettiği, davasını ispat edemediği için men edildiği Vilâyet-i Rumeli’nde kazâ-i Yenişehir müzâfâtından Fener nâhiyesine tâbi‘ Perili? nâm karyede sâkin çoban tâifesinden Yorgi v. Apostol nâm zimmî meclis-i şer‘-i hatîr-i lâzımü’t-tevkīrde yine karye-i mezbûreden işbu hâmilü’l-kitâb Panayot v. Paros nâm zimmîyi ihzâr ve muvâcehesinde üzerine da‘vâ ve takrîr-i kelâm edip bundan akdem bin elli üç senesi Cumâdelâhiresi’nin gurresinde Rumeli’nden İstanbul’a gelinceye değin mezbûr Pana[yot]’un koyununu ra‘y etmek için üç bin akçe ücret ile nefsimi îcâr ve mezbûr Panayot dahi vech-i mübeyyen üzre istîcâr ve kabûl etmişdi hâlen edâ-i hizmet etmekle meblağ-ı mezbûru merkūm zimmetinden alıverilmesini taleb ederim dedikde gıbbe’s-suâl ve akībe’l-istintâk [54a ] mezbûr Panayot cevâbında fi’l-hakīka mezbûr Yorgi’yi vech-i mübeyyen üzre koyunumu ra‘y etmek üzre istîcâr ve kabûl eyledim idi lâkin beynimizde döndürme ta‘bîr olunur kendi malından beş bin akçe ifrâz edip meblağ-ı mezbûr Yorgi için koyun iştirâ edip İstanbul’da bey‘ olundukdan sonra hâsıl olan nemâsı mezbûr Yorgi’ye verilip hâlen bu sene-i mübârekede asl-ı mâlımdan on sekiz bin akçe zararım vardır deyip mezbûr Yorgi’yi minvâl-i muharrer üzre üç bin akçe ücret ile istîcâr ve kabûl ettiğini mezbûr Panayot münkir olıcak mezkûr Yorgi’den sıdk-ı makālini mübeyyine beyyine taleb oldukda ityân-ı beyyineden âciz olup istihlâf etmeğin merkūm Panayot dahi minvâl-i merkūm üzre mezbûr Yorgi’yi üç bin akçe ücret ile istîcâr ve kabûl etmediğine alâ vefki’l-mes’ûli anh yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle merkūm Yorgi’yi mu‘ârazadan men‘ birle işbu hurûf bi’t-taleb ketb ve terkīm olunup tâlibi mezbûr Panayot yedine vaz‘ ve i‘tâ olundu. Tahrîren fi’l-yevmi’s-sânî min Cumâdelâhire li sene erba‘a ve hamsîn ve elf. Şuhûdü’l-hâl: Ali Beşe b. Mustafa min huddâm, İbrahim Çelebi b. Ali min huddâm, Hüseyin Çelebi b. Ali min huddâm, Ali b. Mustafa, Mustafa b. Veli, Süleyman b. Turgud, Ahmed Beşe er-Râcil Çukadâr, Bayram Dede min huddâm, Musa b. Mustafa min huddâm ve gayruhüm