Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 257 Hüküm no: 291 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefât eden Derviş Ahmed’in zevcesi Kâtibe Hâtun bt. Abdülmennân’ın mehir ve miras hissesi karşılığında muhtelif eşyayı oğlu Derviş Mehmed’den aldığı Havâss-ı Aliyye -humiyet ani’l-âfât ve’l-beliyye- müzâfâtından Yenikapı hâricinde merhûm Merkez Efendi mahallesinde sâkin iken bundan akdem vefât eden Derviş Ahmed’in verâset-i zevce-i metrûkesi Kâtibe Hâtun bt. Abdülmennân ve sulbî kebîr oğlu Derviş Mehmed ile sulbî sagīr oğlu Ali ve sulbiye sagīre kızı Fâtıma’ya münhasıra olduğu şer‘an mütehakkik oldukdan sonra mezbûre Kâtibe Hâtun meclis-i şer‘-i hatîr-i lâzımü’t-tevkīrde müteveffâ-yı mezbûrun muhallefâtına vâzı‘ü’l-yed olup sagīrân-ı mezbûrân taraflarından vasiyy-i şer‘îleri işbu râfi‘ü’l-kitâb oğlu Derviş Mehmed mahzarında ikrâr-ı tâm ve takrîr-i kelâm edip zevcim müteveffâ-yı mezbûr Ahmed’in zimmetinde mütekarrir olan iki bin cedîd ceyyid râyic fi’l-vakt akçe mehr-i müeccelimi ve müteveffâ-yı mezbûrdan irs-i şer‘le bana isâbet eden sümün hisse-i şer‘iyyem mukābelesinde muhallefâtına vâzı‘ü’l-yed olan mezbûr Derviş Mehmed yedinden üç yüz akçe kıymetli bir beled[î] döşek ve iki yüz [akçe] kıymetli bir beledî yorgan ve iki yüz akçe kıymetli iki beledî yastık ve yüz yirmi akçe kıymetli bir tencere ve yüz [akçe] kıymetli bir sahan ve kırk akçe kıymetli bir hamam tası ve beynimizde ma‘lûm iki yüz akçe kıymetli hamam esbâbını ahz u kabz edip müteveffâ-yı mezbûrun muhallefâtına müte‘allik da‘vâ ve talebden mezbûr Derviş Mehmed’in zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim ba‘de’l-yevm bi’z-zât benden veyâhud bi’l-vekâle vekîlimden husûs-ı mezbûra müte‘allik da‘vâ ve nizâ‘ zuhûr ve sudûr ederse lede’l-hükkâmi’l-kirâm makbûle olmaya dedikde mukırra-i mezbûrenin ber vech-i mübeyyen cârî ve sâdır olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîr[en] fi’l-yevmi’l-hâmis min Cumâdelâhire li sene erba‘a ve hamsîn ve elf. Şuhûdü’l-hâl: Ahmed Efendi el-İmâm, Mahmud Çelebi b. Hüseyin el-Müezzin, Şaban b. Receb, Ali Çelebi b. İbrahim, Ali Beşe b. Mehmed min huddâm, Baba Süleyman min huddâ[m] ve gayruhüm