Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 258 Hüküm no: 293 Orijinal metin no: [54b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimo’nun mülk bostan yerini Zogro v. Yani’ye sattığı Vilâyet-i Rumeli’nde Küçük Badracık kazâsına tâbi‘ Tomyani [nâm] karyede sâkin Yani v. Dimo nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Zogro v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre hudûdu dâhilinde vâki‘ bir tarafdan Lambo v. Yorgi mülkü ve etrâf-ı selâsesi tarîk-i âm ile mahdûd bir bâb tahtânî beyti ve bir dip dut ağacını ve bir dip üzüm ağacını ve iki dip ayva ağacını müştemil tahmînen bir dönüm mülk bostan yerimi cemî‘ tevâbi‘ ve levâhıkı ve kâffe-i menâfi‘ ve merâfıkı ile mezbûr Zogro’ya iki bin iki yüz akçeye tarafeynden îcâb ve kabûlü hâvî bey‘-i kat‘î ile bey‘ edip ol dahi vech-i muharrer üzre iştirâ ettikden sonra semen-i mezbûrü’n-na‘t iki bin iki yüz akçeyi yedinden bi’t-tamâm ve’l-kemâl ahz u kabz edip mebî‘-i mezbûru mahallinde kabza müşterî-i mezbûr Zogra’yu taslît eyledim ba‘de’l-yevm mârrü’z-zikr bostan yeri mezbûr Zogra’nun mülk-i müşterâ-yı sahîh ve sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min Cumâdelâhire li sene erba‘a ve hamsîn ve elf. Şuhûdü’l-hâl: Rizo v. Miloş, Kalo v. İstadi, Dimo v. Peraşki, İskarlet v. Kalçemarbo, Nikola v. Peraşki, Lambo v. Kalsar, Panayot v. İstadi