Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 257 Hüküm no: 292 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Nikola’nın mülk bostan yerini Dimitri v. Todori’ye sattığı Vilâyet-i Rumeli’nde Gerbeniş kazâsına tâbi‘ Tırnova nâm karyeden Yorgi v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Dimitri v. Todori muvâcehesinde bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkden karye-i mezbûre kurbunda Palyahorya nâm mevzi‘de vâki‘ bir tarafdan Mihal v. Cazoh mülküne ve bir tarafdan İsteryano v. Nikola tarlasına ve bir tarafdan müşterî-i mezbûr Dimitri mülküne ve bir tarafdan Yani v. Lazo yoncalığına müntehî taş duvar havluyu müştemil bir kıt‘a mülk bostan yerini cümle tevâbi‘ ve levâhıkı ve âmme-i menâfi‘ ve merâfıkı ile merkūm Dimitri’ye iki bin dört yüz cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm zikr olunan bir kıt‘a bostan yeri merkūm Dimitri’nin mülk-i müşterâ-yı sarîhidir dedikde gıbbe’t-tasdîk mâ vaka‘a bi’t-taleb ketb olundu. Şuhûdü’l-hâl: Mustafa b. Mehmed, Ali Beşe b. Mustafa, Hüseyin Çelebi b. Ali, Bayram Sofu …?, Rizo [v.] Polo, Nikola [v.] Yorgi, Nikola [v.] İsteryano, Nikola [v.] Dimitri, Dimitri [v.] …?, Hristo v. …?