Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 263 Hüküm no: 300 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Hasan’ın Cafer Paşa Vakfı’ndan ödünç aldığı paranın ödenmesinin tenbîh edildiği Medîne-i Ebâ Eyyûb-i Ensârî -radiye anhu Rabbühü’l-Bârî-’de vâki‘ merhûm Cafer Paşa vakfı’na bi’l-fi‘l mütevellî olan bâ‘isü’l-kitâb zübdetü’l-eşbâh İsmail Çelebi b. Resul meclis-i şer‘-i hatîr-i lâzımü’t-tevkīrde Dergâh-ı âlî -dâme mahfûfen bi’l-me‘âlî- yeniçerileri zümresinden Takyecibaşı mahallesinde sâkin Mustafa Beşe b. Hasan nâm kimesne[yi] ihzâr ve mahzarında üzerine da‘vâ ve takrîr-i kelâm edip asl-ı mâl-ı vakf-ı mezbûrdan merkūm Mustafa Beşe zimmetinde karz-ı şer‘îden on altı kıt‘a riyâlî guruş ve bin elli üç Saferü’l-hayrının gurresinden târih-i kitâba gelinceye değin müctemi‘a olan mu‘âmeleden iki yüz seksen akçe ki cem‘an mezbûr Mustafa Beşe zimmetinde mâl-ı vakf-ı mezbûrdan bin beş yüz altmış akçe vardır hâlen tevliyyetim hasebiyle cânib-i vakf-ı mezbûr için alıverilmesi matlûbumdur dedikde gıbbe’s-suâl ve akībe’l-istintâk mersûm Mustafa Beşe cevâbında fi’l-hakīka vech-i mübeyyen üzre asl-ı mâl-ı vakf-ı mezbûrdan ve mu‘âmeleden cânib-i vakf-ı mezbûra zimmetinde bin beş yüz altmış akçe lâzımü’l-edâ ve vâcibü’l-kazâ deyn olduğuna bi-tav‘ihî mukır ve mu‘terif olmağın meblağ-ı mersûmun cânib-i vakf-ı mezbûr için mütevellî-i mûmâ-ileyhe edâsına hüküm birle merkūm Mustafa Beşe’ye tenbîh olunup mâ hüve’l-vâki‘ gıbbe’l-ibtigā sebt ve imlâ ve tahrîr-i inşâ olundu. Hurrire fi’l-yevmi’t-tâsi‘ min Cumâdelâhire li sene erba‘a ve hamsîn ve elf. Şuhûdü’l-hâl: Mehmed Çelebi b. Mehmed Nalbandzâde, Mehmed Çelebi b. eş-Şeyh Hızır, Halil Çelebi b. Hüdâverdi, Mustafa Beşe b. Mehmed el-Muhtesib, Mustafa Çelebi b. Veli, Ali Beşe b. Mustafa, Baba Süleyman ve gayruhüm mine’l-huzzâr