Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 262 Hüküm no: 299 Orijinal metin no: [55a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Toyo’nun menzil yerini Rizo v. Apostol’e sattığı Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Fabca? nâm karye sükkânından Yorgi v. Toyo nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Rizo v. Apostol nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip akd-i âtî sudû[runa] değin silk-i mülkümde münselik olan emlâkimden karye-i mezbûrede vâki‘ bir tarafdan Paros v. Topo ve bir tarafdan Yani v. Topo mülküne ve bir tarafdan vâdi ve bir tarafdan tarîk-i âm ile mahdûd muhavvatayı hâvî menzil yerini cümle tevâbi‘ ve levâhıkı ve kâffe-i menâfi‘ ve merâfıkı ile mezbûr Rizo’ya bin yüz cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ [55b ] ol dahi ber vech-i meşrûh nefsi için iştirâ eyledikden sonra semen-i mezbûr bin yüz akçeyi yedinden bi’t-tamâm ve’l-kemâl ahz u kabz edip mebî‘-i mezkûru mahallinde kabza müşterî-i mersûmu taslît eyledim ba‘de’l-yevm mebî‘-i mezkûru merkūm Rizo’nun mülk-i müşterâ-yı sahîh ve sarîhidir keyfe mâ yeşâ’ ve yürîd bilâ-nizâ‘ min karîb ev ba‘îd mutasarrıf olsun dedikde mukırr-ı mezbûru cemî‘ kelimâtından müşterî-i merkūm vicâhen tasdîk ve şifâhen tahkīk eylemeğin mâ hüve’l-vâki‘ bi’t-taleb ketb ve terkīm olundu. Hurrire fi’l-yevmi’s-sâmin min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed min huddâm, Ali Beşe b. Mustafa min huddâm, Mustafa b. ( ) min huddâm, İbrahim Çelebi b. Mustafa, min huddâm, Dimo v. Yani, Apostol v. Dimo, Yani v. İstemad, Lambo v. Rizo, Andron v. Şiro, Yani v. Paros ve gayruhüm