Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 264 Hüküm no: 302 Orijinal metin no: [55b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Kurd’un boşandığı kocası Receb b. Ali’de olan alacağını tahsil ettiği ve zimmetini ibrâ ettiği Mahrûse-i Kostantıniyye -humiyet ani’l-âfât ve’l-beliyye- mahallâtından Avcı Bey mahallesinde sâkine Rahime bt. Kurd nâm Kıbtiye hâtun meclis-i şer‘-i hatîr-i lâzımü’t-tevkīrde zevc-i mutallıkı olan işbu râfi‘ü’l-kitâb Receb b. Ali Kıbtî muvâcehesinde bi’t-tav‘ ve’r-rızâ ikrâr ve takrîr-i kelâm edip zevc-i sâbıkım mezbûr Receb zimmetinde deyn-i şer‘îden yedi yüz seksen akçe hakkım var idi el-hâletü hâzihî meblağ-ı mersûm yedi yüz seksen fıddî cedîd ceyyid râyic fi’l-vakt akçeyi merkūm Receb yedinden bi’t-tamâm ve’l-kemâl ahz u kabz edip meblağ-ı mezbûra müte‘allik da‘vâ ve talebden zimmetini ibrâ-i âm [ile] ibrâ ve iskāt-ı tâm ile [iskāt] eyledim ba‘de’l-yevm meblağ-ı mezbûra müte‘allik merkūm Receb ile kat‘â da‘vâ ve nizâ‘ım yokdur dedikde mukırra-i mezbûre Rahime Hâtun’un minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Receb bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâmin min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe b. Abdülmennân, Hüseyin Çelebi b. Ali Beşe, Mustafa b. Veli, Baba Süleyman [b.] Turgud ve gayruhüm mine’l-huzzâr