Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 264 Hüküm no: 303 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Çavuş b. Abdülmennân’ın satın aldığı câriyenin değerini düşürecek hastalığı çıktığı için Ümmügülsüm Hâtun bt. Mehmed Ağa hakkında açtığı ayıp davasından vazgeçtiği Mahmiye-i İstanbul’da Ayasofya-i kebîr mahallesi sâkinlerinden olup Dergâh-ı âlî -dâme mahfûfen bi’l-me‘âlî- çavuşlarından umdetü’l-a‘yân Yusuf Çavuş b. Abdülmennân meclis-i şer‘-i hatîr-i lâzımü’t-tevkīrde medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı Paşa mahallesinde sâkine işbu sâhibetü’l-vesîkati’ş-şer‘iyye fahrü’l-muhadderât zahrü’l-muvakkarât Ümmügülsüm Hâtun bt. Mehmed Ağa tarafından ibrâ ve sulh-ı âti’l-beyânı tasdîke vekîl olup hasm-ı câhid-i şer‘î mahzarında mezbûreyi ma‘rifet-i şer‘iyye ile ârifeyn olan İbrahim b. Mahmud ve Osman Çelebi b. Nasuh nâm kimesneler şehâdetleriyle vekâleti sâbite olan umdetü’l-kuzâti’l-kirâm Mustafa Efendi b. Hüseyin mahzarında takrîr-i kelâm edip târih-i kitâbdan iki sene mukaddem müvekkile-i merkūme Ümmügülsüm’den gāibet ani’l-meclis olup evsâfı beynimizde ilm-i şer‘î ile ma‘lûme Rûsiyyetü’l-asl Şahbaz bt. Abdullah nâm câriye-i memlûkesini cemî‘ uyûbdan berî olmak üzre üç yüz elli kıt‘a riyâlî guruşa iştirâ ve tesellüm eyledim idi. Câriye-i mezbûrenin inde’t-tüccâr noksan-ı semen îcâb eder sar‘a marazına mübtelâ olduğu zâhir olup ayb-ı kadîm olduğuna benden beyyine taleb olundukda beyyine ikāmetinden âciz olup müvekkile-i mezbûreye yemîn verip câriye-i mezbûreyi red ve def‘ eylediğim meblağ-ı mezbûrü’n-na‘tı almak için da‘vâ ve nizâ‘ sadedinde oldum idi el-hâletü hâzihî sadedinde olduğum da‘vâ-yı ayıbdan müvekkile-i mezbûre Ümmügülsüm Hâtun’un zimmetini ibrâ-i âmm-ı kātı‘ü’n-nizâ‘la ibrâ ve iskāt eylediğimden mâ‘adâ câriye-i mezbûreyi cemî‘ uyûbu ile kabûl eyledim ba‘de’l-yevm bi’z-zât benden veya bi’l-vekâle vekîlimden husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr Mustafa Efendi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin min Cumâdelâhire li sene erba‘a ve hamsîn ve elf. Şuhûdü’l-hâl: Fahrü’l-müderrisîn İsmail Efendi [b.] Hürrem Şah, Mehmed b. Abdülmennân, Hasan Ağa b. Abdullah, Mehmed, Hüseyin Çelebi b. Abdullah, Kasım b. Abdullah, el-Hâc Ahmed Beşe Çukadâr, Hüseyin Çelebi el-Muhzır, Mahmud Bey b. Sinan, Hüseyin Bey b. Abdullah ve gayruhüm