Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 270 Hüküm no: 312 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cizye tahsildarı Hasan’ın Ayayorgi köyü ahâlîsinin 1048 yılına ait cizyelerini ödemedikleri şikâyeti üzerine tahsili için Hâslar kadısına buyruldu Akzâ kuzâti’l-müslimîn evlâ vülâti’l-muvahhidîn, ma‘denü’l-fazli ve’l-yakīn, vârisü ulûmi’l-enbiyâi ve’l-mürselîn, hüccetü’l-hakkı ale’l-halkı ecma‘în el-muhtas bi-mezîdi inâyeti’l-meliki’l-mu‘în mevlânâ Hâslar kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki: Vilâyet-i Hâslar keferesinin bin kırk sekiz senesine mahsûb olmak üzre cizyeleri cem‘ine memûr olan Hasan nâm kulum hâlen Dersaâdet’ime gelip arzuhâl sunup defter-i merkūma tâbi‘ Ayayorgi nâm karye keferesinin tuğrâlı defter mûcebince cizyelerin taleb eylediğimde ba‘zı bahâne eyleyip târih-i merkūm için lâzım gelen cizyelerin tuğrâlı defter mûcebince vermekde inâd ve muhâlefet eyleyip zimmetlerinde kalmışdır, tuğrâlı defter mûcebince alıverilmek bâbında emr-i şerîf ricâ ederim deyû bildirmeğin tuğrâlı defter mûcebince amel olunmak emr edip buyurdum ki hükm-i şerîfimle mezbûr kulum -zîde kadruhû- vardıkda bu bâbda sâdır olan fermân-ı sa‘âdetim mûcebince amel edip dahi zikr olunan karye keferesinin târih-i mezkûra mahsûb olmak üzre uhdelerine edâsı lâzım gelen cizyelerinin cem‘ine memûr olan mezbûr kuluma elinde olan emr-i şerîf ve tuğrâlı defter mûcebince taleb ve tahsîl ettirip emr-i şerîfime muhâlif ve tuğrâlı deftere mugāyir zikr olunan karye re‘âyâsına bî-vech ve bilâ-sebeb ta‘allül ve nizâ‘ ettirmeyesiz şöyle bilesin alâmet-i şerîfe i‘timâd kılasın. Tahrîren fi’l-yevmi’s-sânî ve’l-ışrîn min Şevvâli’l-mükerrem li sene selâse ve hamsîn ve elf. Be-makām-ı Kostantıniyye el-mahrûse. Kad vasale ileynâ fi’l-yevmi’s-sâbi‘ ve’l-ışrîn min şehri Rebî‘ilevvel fi’t-târihi’l-mezbûr.