Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 271 Hüküm no: 313 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristodolo v. Papa Yani’nin mülk menzilini Felko bt. Papa Yani’ye sattığı Mahmiye-i İstanbul’da Eski odalar başında sâkin hayyât tâifesinden Hristodolo v. Papa Yani nâm zimmî meclis-i şer‘-i hatîr-i lâzımü’t-tevkīrde li ebeveyn kız karındaşı işbu hâmiletü’l-kitâb Felko bt. Papa Yani nâm Nasrâniyye tarafından bey‘-i âti’z-zikri tasdîke vekîl olup hasm-ı şer‘î-i câhid mahzarında Mihal v. Arzuman ve Aleksi v. Nikola şehâdetleri ile şer‘an vekâleti sâbite olan Kosta [v.] Aşnasno nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip akdi âtî sudûruna değin silk-i mülk-i sahîhimde münselik olan emlâkden mahrûse-i Edirne’den Kafeskapısı mahallesinde vâki‘ bir tarafdan Kosta v. ( ) mülküne ve bir tarafdan Todori v. ( ) mülküne ve bir tarafdan Papa Şiroblu v. ( ) mülküne ve bir tarafdan tarîk-i âma müntehî ve mahdûd iki bâb fevkānî beyti ve sofayı ve ahırı ve kenîfi ve muhavvatayı müştemil mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile kız karındaşım mezbûre Felko’ya altı bin iki yüz fıddî cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz edip mebî‘-i mezkûru mahallinde kabza müşteriye-i merkūmeyi taslît eyledim, ba‘de’l-yevm menzil-i mahdûd-ı mezkûr merkūme Felko’nun mülk-i müşterâ-yı sarîhidir keyfe mâ [teşâ’] ve hasbe mâ türîd mutasarrıfa olsun dedikde mukırra-i mezbûre Hristodolo’nun vech-i mübeyyen üzre cârî olan ikrâr ve takrîrini vekîl-i mezbûr Kosta bi’l-muvâcehe tasdîk edicek mâ hüve’l-vâki‘ gıbbe’l-ibtigā sebt olundu. Hurrire fi’l-yevmi’r-râbi‘ ve’l-ışrîn min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe Serbölük, Hüseyin Çelebi b. Ali, Sofu Bayram el-Muhzır, Kosta v. Koçi, Dimitri [v.] Apostol, Nestro v. Dimo, Yanaki v. Dimitri, Toma v. Manol ve gayruhüm mine’l-huzzâr