Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 273 Hüküm no: 316 Orijinal metin no: [58a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferahşad Hâtun Vakfı’ndan Sinan Paşa Çiftliği ahâlîsinden ellerindeki temessük ve vakfiyeye aykırı olarak resm-i hamr talep edildiği şikâyeti üzerine buyruldu Akzâ kuzâti’l-müslimîn, evlâ vülâti’l-muvahhidîn, ma‘denü’l-fazli ve’l-yakīn, vârisü ulûmi’l-enbiyâi ve’l-mürselîn, hüccetü’l-hakkı ale’l-halkı ecma‘în el-muhtas bi-mezîdi inâyeti’l-meliki’l-mu‘în mevlânâ Hâslar kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki: Kazâ-i mezbûrede vâki‘ merhûme Ferahşad Hâtun vakfı’ndan Sinan Paşa Çiftliği demekle ma‘rûf çiftlik ahâlîsi hâlen Dîvân-ı hümâyûnuma âdem gönderip biz cemî‘ tekâlîfden ve avârızdan mu‘âf ve müsellem olup cümle mahsûl vakfın olmak üzre elimizde temessükât ve vakfiye-i ma‘mûlün bihâ var iken hâlen ümenâ bizden resm-i hamr taleb edip rencîde ederler hayfdır elimizde olan temessükât ve vakfiye ve mu‘âfnâme-i hümâyûnumuza muhâlif dahl ve rencîde ettirilmemek bâbında emr-i şerîf verilmek ricâ ederiz deyû bildirdikleri ecilden imdi şart-ı vâkıf üzre [resm-i] hamr taleb olunmaya deyû fermânım olmuşdur, buyurdum ki hükm-i şerîfim vardıkda bu bâbda sâdır olan emrim üzre amel edip dahi şart-ı vâkıf üzre [resm-i] hamr taleb ettirmeyip rencîde ve remîde ettirmeyesiz şöyle [bile]siz alâmet-i şerîfe i‘timâd kılalar. Tahrîren fi’l-yevmi’l-hâmis min şehri Şevvâli’l-mükerrem sene selâse ve hamsîn ve elf. Be-makām-ı Kostantıniyye. Kad vasale ileynâ fî 26 min Rebî‘ilâhir sene 1054.