Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 272 Hüküm no: 315 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Selim Hân Evkâfı’na tâbi Rumeli’deki Ralagoşa mukâtaasının vakıf mütevellîsi tarafından Yusuf Ağa’nın uhdesine verildiği Vech-i tahrîr-i hurûf budur ki: Mahmiye-i İstanbul’da vâki‘ cennet-mekân firdevs-âşiyân merhûm ve mağfûr Sultan Selim Hân-ı kadîm -tâbe serâhu- hazretlerinin câmi‘-i şerîf ve imâret-i âmireleri evkāfından olup vilâyet-i Rumeli’nde Ralagoşa? ve tevâbi‘i mukāta‘asının senesi doksan dokuz bin akçeye olup işbu sene bin elli dört Muharremü’l-harâmı’nın ikinci gününde vâki‘ Mart ibtidâsından …? maktû‘-ı kadîmî olan doksan dokuz bin akçeyi bi’t-tamâm vakf-ı şerîfe bi-esrihim edâ ve teslîm eylemek üzre işbu bâ‘isü’l-kitâb fahrü’l-emâsil ve’l-akrân Yusuf Ağa -zîde mecduhû- mukāta‘a-i mezbûru tâlib ve râgib olmağın mezkûra verilmesi vakfa evlâ ve enfa‘ olmağla senesinde doksan dokuz bin akçeye tevliyyetim hasebiyle der-uhde edip maktû‘u olan doksan dokuz bin akçeyi tamâmen yedinden vakf için ahz u kabz edip kadîmden vakfa âid ve râci‘ olan a‘şâr-ı şer‘iyye ve rüsûm-ı örfiyye ve cürm-i cinâyet ve bâd-ı hevâ ve mâl-ı gāib ve mâl-ı mefkūd ve âdet-i ağnâm ve resm-i arûsâne ve bennâk ve yava ve kaçkın ve beytülmâl-i âmme ve hâssa ve tapu-yı zemîn ve rüsûm-ı örfiyyesinden min külli’l-vücûh serbestlik üzre zabt edip sene-i sâbıkalarda zâbit olanlar her nice zabt edegeldilerse mezkûr Yusuf Ağa dahi ol vechile zabt edip ve taraf-ı âhardan dahl ve ta‘arruz eylemeyeler deyû yedine işbu temessük vaz‘ olundu. Tahrîren fî evâhiri Muharremi’l-harâm li sene erba‘a ve hamsîn ve elf. El-fakīr? ..? Cafer Ağa el-Mütevellî mine’l-vakfi’l-mezbûr. Kad vasale fi’l-yevmi’s-sâdis mine’s-Saferi’l-hayr li seneti’l-mezbûre.