Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 275 Hüküm no: 319 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mevlânâ Ahmed Halîfe’nin babası Seyyid Mehmed yerine Ahmed Halîfe Câmii’ne ihlashân olarak tayin edildiği Nişân-ı şerîf-i tuğrâ-yı garrâ-yı hâkānî hükmü oldur ki İşbu râfi‘-i tevkī‘-i refî‘-i sa‘âdet-şâh-ı hâkānî ve hâmil-i râfi‘-i belî‘-i mekremet-ünvân-ı tâcidârî mevlânâ Ahmed Halîfe hakkında mezîd-i inâyet-i pâdişâhânem vücûda getirip Hasköy kazâsında vâki‘ merhûm Ahmed Halîfe Câmi‘-i şerîfinde pîr ve ihtiyâr olduğu sebebden ref‘ olunan babası Seyyid Mehmed yerine bin elli bir Ramazân-ı şerîfin dördüncü gününden yevmî yedi akçe vazîfe ile hatîb ve yevmî üç akçe ile ihlashân nasb edip bu berât-ı sa‘âdet-âyâtı verdim ve buyurdum ki ba‘de’l-yevm mezbûr varıp ref‘ olunan babası yerine câmi‘-i mezbûrda yevmî yedi akçe ile hatîb ve yevmî üç akçe ile ihlashân olup mezbûr Ahmed hâlen sabî olmağla nâibi edâ ede hizmet eyledikden sonra cem‘an on akçe ve vazîfesin evkāf-ı mezbûre mahsûlünden mâh be-mâh mütevellîsinden alıp mutasarrıf olup ol bâbda hiç ahad mâni‘ ve müzâhim olmaya şöyle bileler alâmet-i şerîfe i‘timâd kılalar. Tahrîren fi’l-yevmi’r-râbi‘ min şehri Ramazâni’l-mübârek li sene ihdâ ve hamsîn ve elf. Be-makām-ı Kostantıniyye el-mahrûse. Kad vasale ileynâ fi’l-yevmi’s-sâmin aşer min Saferi’l-muzaffer li sene erba‘a ve hamsîn ve elf.