Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 63 Hüküm no: 25 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Süleyman Çelebi Evkâfı’ndan olan mescid ile imam ve müezzine meşrûta olan evlerin mütevelli tarafından tamir ettirildiği ve talebi üzerine yapılan harcamaların keşfinin yapıldığı Medîne-i Hazret-i Ebâ Eyyûb el-Ensârî -aleyhi rahmetü’l-meliki’l-Bârî-de merhûm Kiremitçi Süleyman Çelebi Evkāfı’na bi’l-fi‘il mütevellî olan bâ‘is-i hâze’l-kitâb umdetü’l-eşbâh Mehmed Çelebi b. Ahmed meclis-i şer‘-i şerîfde ikrâr-ı tâm ve takrîr-i kelâm edip vâkıf-ı merhûm-ı müşârun-ileyhin yine medîne-i mezbûrede binâ eylediği mescid-i şerîf ve yine mescid-i mezbûr imâmına ve müezzinine meşrûta olan menziller mürûr-ı eyyâm ile harâba müşrif olmağla bundan akdem mescid-i mezbûru ve ol evleri ta‘mîr ve termîme kıbel-i şer‘-i şerîfden me’zûn olmuşidim, hâlen tevliyet-i mahkiyem hasebiyle mescid-i mezbûrun lâzımü’l-meremmet olan mevâzi‘i ile ol imâm ve müezzine meşrûta olan evleri vakf-ı mezbûrun intikālâtı mahsûlünden izn-i şer‘le imâret ve meremmet etmişimdir, kıbel-i şer‘-i hatîrden üzerine varılıp ba‘de’l-keşf ve’l-mesâha harc u sarf eylediğim akçe beyân ve ta‘yîn ve tahmîn-i sahîh ile tahmîn olunmak matlûbumdur dedikde, savb-ı şer‘-i kavîmden Mevlânâ Surûrî Mustafa Efendi el-Müderris irsâl olunup ol dahi hâssa mi‘mârlardan üstâd el-Hâc Hasan b. Ömer ve Mustafa b. Ali ve zeyl-i kitâbda mastûretü’l-esâmî olan bî-garaz müslimîn ile evvelâ mescid-i mezbûra varıp akd-i meclis-i şer‘-i şerîf olundukdan sonra mi‘mârân-ı mezbûrân evkāf-ı merkūme mürtezikası mahzarlarında mesâha ve tahmîn eyledikde müceddeden binâ olunan tûlen otuz dört zirâ‘ ve arzan on üç zirâ‘ bi hesâbi’s-satrancî dört yüz kırk iki zirâ‘ tavanın beher zirâ‘ı yirmişer akçeden sekiz bin sekiz yüz akçe ve yine tûlen ve arzan bi hesâb-ı satrancî beş yüz zirâ‘ tavan-ı mezbûr sakfının beher zirâ‘ı onar akçeden beş bin akçe ve yine tûlen on beş zirâ‘ ve arzan on üç buçuk zirâ‘ bi hesâbi’l-mezbûr yüz seksen beş zirâ‘ ta‘mîr olunan mescid-i mezbûr sakfının beher zirâ‘ı onar akçeden bin dokuz yüz yirmi akçe ve altı aded cam tellerinin beher dânesi yüzer akçeden altı yüz akçe ve bir cedîd mükemmel kapı ile dört aded tırabzan ber vech-i maktû‘ bin sekiz yüz akçe ve mescid-i şerîf için bir kıt‘a ceviz ağacından masnû‘ cedîd mükellef kapı ber vech-i tahmîn bin akçe ve tûlen on üç zirâ‘ ve arzan sekiz zirâ‘ bi hesâb-ı terbî‘î yüz dört zirâ‘ mescid-i şerîf tahta döşemesinin beher zirâ‘ı kırkar akçeden dört bin seksen akçe ve mahfil için binâ olunan cedîd nerdübân ve iki dolab ber vech-i maktû‘ sekiz yüz akçe ve müceddeden binâ olunan bir musanna‘ mihrâb ber vech-i tahmîn iki yüz akçe ve mescid-i mezbûrun sokak kapısında vâki‘ tûlen altı zirâ‘ [ve] arzan dört zirâ‘ bi hesâbi’s-satrancî yirmi dört zirâ‘ müceddeden binâ olunan kapı üstü turası tavanının beher zirâ‘ı ellişer akçeden bin iki yüz akçe ve tûlen ve arzan bi hesâbi’l-mezbûr otuz zirâ‘ tavan-ı mezbûr sakfının beher zirâ‘ı kırkar akçeden bin iki yüz akçe ve sokak kapısı meremmâtı ber vech-i maktû‘ yüz akçe ve abak? meremmâtıyla taşra duvar sıvası ber vech-i tahmîn iki yüz seksen akçe ve müceddeden binâ olunan kestane perde tahtasının beher dânesi onar akçeden dört yüz kırk akçe ve on dört aded Samanlı? merteği beher dânesi onar akçeden yüz kırk akçe ve üç aded haydarî dıraga tahtasının beher dânesi onar akçeden kırk akçe ve mescid-i mezbûrun râyici sıvası ber vech-i tahmîn iki yüz kırk akçe ve dört kıt‘a müceddeden binâ olunan kenîfler ber vech-i maktû‘ altı bin akçe ve mescid-i mezbûrun ta‘mîrâtı için sarf olunan kırk dört vakıyye kurşunun beher vakıyyesi on beşer akçeden altı yüz yetmiş beş akçe ve tûlen ve arzan bi hesâbi’s-satrancî yüz elli zirâ‘ minâre ta‘mîrinin beher zirâ‘ı on beşer akçeden iki bin üç yüz akçe ve bir kıt‘a cedîd kilid seksen iki akçe ve mescid-i mezbûr imâmına meşrûta olan menzilin cemî‘ ta‘mîrâtı için ber vech-i maktû‘ dokuz yüz yirmi akçe ve tûlen ve arzan bi hesâbi’s-satrancî kırk zirâ‘ mescid-i mezbûr müezzinine meşrûta olan menzil sakfının beher zirâ‘ı onar akçeden dört yüz akçe ve tûlen ve arzan bi hesâbi’l-mezbûr yetmiş zirâ‘ abak? meremmâtı olan sakfın beher zirâ‘ı beşer akçeden üç yüz yetmiş akçe ve on bir aded İznikmid tahtasının beher dânesi onar akçeden yüz on akçe ve sokak kapısı üzerinde vâki‘ tûlen sekiz zirâ‘ ve arzan altı zirâ‘ bi hesâbi’s-satrancî kırk sekiz zirâ‘ abak? meremmâtı sakfının beher zirâ‘ı beşer akçeden iki yüz kırk akçe ve bir aded Bartın direği ber vech-i tahmîn yirmi akçe ve yine bi hesâbi’l-mezbûr su kuyusu sakfının beher zirâ‘ı beşer akçeden cem‘an yirmi zirâ‘ yüz akçe ve yirmi dört aded kestane ve otuz aded haydarî tahtasının beher dânesi dörder akçeden iki yüz on altı akçe ki cem‘an otuz sekiz bin doksan üç akçeye bâliğ oldukda mi‘mârân-ı merkūmân ile sukūf ve ebniye ahvâline kemâl mertebe vukūf ve şu‘ûru olan bî-garaz müslimîn işbu ta‘mîrât ancak zikr olunan otuz sekiz bin doksan üç akçe ile olur bundan ekal ve noksan ile mümkün değildir deyû her biri icmâ‘ ve ittifâk ve tahmîn-i sahîh ile tahmîn ve takvîm eylediklerini Mevlânâ-yı müşârun-ileyh [6a] mahallinde ketb ve terkīm ba‘dehû meclis-i şer‘de bi’l-ittifâk inhâ ve takrîr etmeğin mâ hüve’l-vâki‘ bi’l-ibtigā ketb olundu. Fî evâhiri şehri Recebi’l-ferd min şuhûri sene hamsin ve sittîn ve elf. Şuhûdü’l-hâl: Umdetü kuzâti’l-İslâm İbrahim Efendi b. el-merhûm ( ), Abdurrahman Efendi b. Hüdâverdi, el-Hâc Mahmud Bey b. Mirza, Ali Çelebi b. el-merhûm el-Hâc Halil, Fahrü’l-müderrisîn Abdülbâkī Efendi b. Mustafa Efendi, Ali Çelebi b. Süleyman, Halil Çelebi b. Hüdâverdi, Mehmed Çelebi b. Osman, diğer Mehmed Çelebi b. Mehmed, Ebûbekir Dede b. Hasan el-Müezzin, Mehmed Efendi b. Yusuf el-İmâm, Hüseyin Çelebi b. Mehmed, İsmail Çelebi b. İbrahim, Mustafa Beşe çukadâr, Ali Beşe b. Mustafa ve gayruhüm min[e’l-hâzırîn]