Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 62 Hüküm no: 24 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Mehmed’in zevci Ali b. Yakub’dan muhâlaa ile boşandığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Otakçılar mahallesi sâkinelerinden Havva bt. Mehmed nâm hâtun meclis-i şer‘-i şerîf-i lâzımü’t-tevkīrde zevci işbu râfi‘ü’l-kitâb Ali b. Yakub nâm kimesne mahzarında bi tav‘ihâ ikrâr-ı tâm ve ifâde-i merâm edip zevcim mezbûr Ali ile hüsn-i zindegânemiz olmayıp beynimizde şikāk-ı küllî vâki‘ olmağın zimmetinde mütekarrir olan bin beş yüz elli cedîd akçe mehr-i müeccelimden ve nafaka-i iddetimden fâriğa olup ve me’ûnet-i süknâm kendi üzerime olmak üzre merkūm Ali ile muhâla‘a-i sahîha-i şer‘iyye ile muhâla‘a eyleyip zimmetini zevciyete müte‘allik cemî‘ da‘vâdan ibrâ ve iskāt eyledim dedikde ol dahi vech-i meşrûh üzre olan hul‘ı kabûl edip zevciyete müte‘allik âmme-i de‘âvîden biribirimizi ibrâ ve iskāt eyledik dedikde ahadühümâ âharın minvâl-i mübeyyen üzre cârî ve sâdır olan ikrârını vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-hâmis min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Mustafa b. Musa el-Müezzin, Ahmed Beşe b. Mehmed, Ramazan Beşe b. Muharrem, Abdullah Beşe b. İskender, Dilâver b. Abdullah ve gayruhüm mine’l-hâzırîn