Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 261 Hüküm no: 280 Orijinal metin no: [35b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülistan bt. Abdullah’ın Musli Çelebi b. Musa’daki alacağını tahsil ettiği Mahmiye-i İstanbul’da Müneccim Sadi mahallesi sâkinelerinden Gülistan bt. Abdullah nâm hâtun tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân olan Mustafa Efendi b. Yusuf ve Mehmed Çelebi b. Musa nâm kimesneler şehâdetleri ile şer‘an vekâleti sâbite olan Ali Çelebi b. Musa nâm kimesne meclis-i şer‘-i şerîf-i lâzımü’t-teşrîfde işbu bâ‘isü’l-kitâb Musli Çelebi b. Musa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Gülistan’ın mezbûr Musli Çelebi zimmetinde cihet-i deyn-i şer‘îden üç bin akçe hakkı olup hâlâ meblağ-ı merkūmu mezbûr Musli Çelebi yedinden tamâmen ahz u kabz edip meblağ-ı mezbûr üç bin akçeden mezbûr Musli Çelebi zimmetinde bir akçe ve bir habbe hakkı kalmayıp zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis-i aşer min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Bey b. Abdullah, Osman b. Abdullah, Şaban Çelebi b. Hasan, Mustafa Çelebi b. Abdullah, Hasan Beşe b. Abdullah, Sarrâc Hüseyin, Hasan Çelebi ve gayruhüm.