Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 87 Hüküm no: 59 Orijinal metin no: [11a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hâtun bt. Abdülbâki’nin menzilinin vârisleri tarafından Ali Çelebi b. Süleyman’a satıldığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Nazperver mahallesi sâkinelerinden olup bundan akdem vefât eden Rahime Hâtun bt. Abdülbâkī nâm müteveffânın verâseti sadrî kebîr oğulları Kaya ve Hüseyin nâm kimesnelere ve sadriye kebîre kızı Kerime nâm hâtuna münhasıra olduğu şer‘an zâhir ve müte‘ayyin oldukdan sonra mezbûr Hüseyin Çelebi husûs-ı câ’i’z-zikre kendi tarafından asâleten ve karındaşı mezbûr Kaya tarafından vekîl olup bimâ hüve tarîkü’s-sübût şer‘an vekâleti sâbite oldukdan sonra vekâleten ve merkūme Kerime Hâtun’un dahi zevci ve tarafından husûs-ı âti’z-zikre vekîl-i sâbitü’l-vekâlesi Halil Çelebi b. Hüdâverdi nâm kimesne meclis-i şer‘-i şerîf-i lâzımü’t-tevkīrde işbu râfi‘ü’l-kitâb Ali Çelebi b. Süleyman muvâcehesinde her biri bi’l-asâle ve bi’l-vekâle ikrâr ve i‘tirâf edip müteveffât-ı merkūmenin muhallefâtından olup mahalle-i merkūmede vâki‘ bir tarafdan Kaytas Bey b. Abdülmennân mülkü ve bir tarafdan müezzine meşrûta menzil ve bir tarafdan vâdi ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve bir su kuyusunu ve havluyu müştemil olan mülk-i mevrûs menzilimizi mesfûr Ali Çelebi’ye sekiz bin beş yüz akçeye bey‘-i kat‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semen-i mezbûr sekiz bin beş yüz akçeyi yedinden tamâmen ahz ü kabz eyledik ba‘de’l-yevm menzil-i mezbûr mesfûr Ali Çelebi’nin mülk-i müşterâsı olmuşdur keyfemâ yeşâ ve hasbemâ yehtâr mutasarrıf olsun dediklerinde gıbbe’t-tasdîki’ş-şer‘iyyi’l-vicâhî mâ hüve’l-vâki‘ gıbbe’t-taleb ketb olundu. Fi’l-yevmi’s-sânî min şehri Ramazâni’l-mübârek min şuhûri sene hamsin ve sittîn ve elf. Şuhûdü’l-hâl: Mehmed Bey b. Ahmed, Ahmed Çelebi b. Hasan, Ahmed Bey b. Haydar, Mehmed Çelebi b. Ahmed, Receb Efendi b. Abdi, Mustafa Çelebi b. Mehmed ve gayruhüm mine’l-hâzırîn