Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 86 Hüküm no: 58 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye bt. Abdülmennân’ın Tavşan Yani’den olan oğlu Mehmed’in nafaka davasında sulh olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Serv mahallesi sâkinelerinden Rukiye bt. Abdülmennân nâm hâtun meclis-i şerî’at-i şerîfede işbu râfi‘ü’s-sifr Tavşan Yani v. ( ) nâm nasrânî tarafından husûs-ı câ’i’z-zikre vekîl olup Hüseyin Efendi b. Mahmud ve Hasan Çavuş b. Hızır şehâdetleriyle şer‘an vekâleti sâbite olan fahrü’l-cüyûş Mehmed Çavuş b. Ahmed nâm vekîl muvâcehesinde tav‘an ikrâr ve i‘tirâf edip müvekkil-i mezbûr Tavşan Yani’nin kendi firâşından hâsıl olan sulbî oğlu Mehmed nâm sagīrin dört buçuk senede müctemi‘ olan yevmî dörder akçe nafaka-i mefrûzasından cem‘an beş bin yedi yüz altmış akçe nafakasını bundan esbak mezbûr Tavşan Yani’den da‘vâ ve taleb eylediğimde vermede te‘allül etmekle beynimizde münâza‘ât-ı kesîre ve muhâsamât-ı şedîde cereyânından sonra vesâtat-i muslihîn ile nafaka-i mezbûreden beni üç bin akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden tamâmen ahz ü kabz eyledim târih-i kitâba gelince mezbûr Tavşan Yani’nin nafakaya müte‘allik da‘vâdan zimmetini ibrâ ve iskāt eyledim dedikde mezbûre Rukiye Hâtun’un kelimât-ı mahkiyesini vekîl-i mezbûr vicâhen ve şifâhen tasdîk etmeğin mâ hüve’l-vâki‘ bi’l-ibtigā ketb olundu. Fî selhi Şa‘bâni’l-mu‘azzam min şuhûri sene hamsin ve sittîn ve elf. Şuhûdü’l-hâl: Mehmed Çelebi b. Abdullah, İbrahim Efendi b. Halil, Ramazan Bey b. Mahmud, Mustafa Çavuş b. Ali, Mahmud Beşe b. Yusuf, Mustafa Beşe b. Safer?, Mehmed Efendi el-Müezzin, Mehmed Beşe b. Abdullah ve gayruhüm