Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 97 Hüküm no: 74 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Rizo’nun ölen Sofyanoz’da kalan alacağını vârisi olan oğlu Yorgi’den tahsil ettiği Fi’l-asl vilâyet-i Rumeli’nde Yenişehir kazâsı ihtivâsından Fenar nâhiyesi muzâfâtından Manastıraki nâm karyeden olup hâlen mahrûse-i İstanbul’da bakkal tâ’ifesinden olan Yorgi v. Rizo nâm zimmî meclis-i şer‘-i şerîf-i lâzımü’t-teşrîfde tâ’ife-i merkūmeden diğer Yorgi v. Sofyanoz nâm [zimmî] muvâcehesinde üzerine da‘vâ ve takrîr-i kelâm edip merkūm diğer Yorgi’nin babası olup bundan akdem hâlik olan mersûm Sofyanoz zimmetinde cihet-i deyn-i şer‘îden on iki bin cedîd akçe hakkım olup kable’l-ahz hâlik olmağla zimmetinde kalmışidi, hâlen metrûkâtına vâzı‘ü’l-yed olan oğlu merkūm diğer Yorgi’den meblağ-ı mezbûru taleb ederin suâl olunsun dedikde gıbbe’s-suâl mersûm Yorgi cevâbında fi’l-hakīka babam hâlik-i mezbûrun müdde‘î-i mezbûr Yorgi’ye minvâl-i muharrer üzre cihet-i merkūmeden meblağ-ı mezbûr on iki bin akçe lâzımü’l-edâ deyni var idi deyû tav‘an ikrâr ve i‘tirâf etmeğin ikrârı mûcebince meblağ-ı mezbûru babası hâlik-i merkūmun metrûkâtından müdde‘î-i mersûma edâ ve teslîme mezbûr Yorgi’ye tenbîh birle mâ hüve’l-vâki‘ ketb olundu. Fi’l-yevmi’s-sânî aşer min Ramazâni’l-mübârek sene 1065. Şuhûdü’l-hâl: Abdullah Efendi b. ( ) el-Müderris, Mehmed Efendi b. Habil, Mahmud Beşe çukadâr, Ali Beşe b. Mustafa, Hüseyin Çelebi b. Ali ve gayruhüm mine’l-hâzırîn