Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 97 Hüküm no: 73 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çobanların peynircilere sattıkları teleme peyniri için narhdan fazla para istedikleri, eskiden beri teleme peynirinin fiyatının dil peynirinin narhının yarısı kadar olduğunun tesbiti Medîne-i Hazret-i Ebâ Eyyûb el-Ensârî -razıyallâhü anhü rabbühü’l-melikü’l-Bârî- peynirci tâ’ifesinden Himmet Beşe b. Mehmed ve İbrahim Beşe b. Resul nâm kimesneler ile Yani v. Dimo ve diğer Yani v. Niko ve Dimo v. Miro nâm zimmîler meclis-i şer‘-i şerîf-i lâzımü’t-teşrîfde her biri takrîr-i kelâm ve ta‘bîr-i merâm edip biz kadîmî teleme peynirinden dil peyniri işleyegelmekle bu âna gelince Havâss-ı Kostantıniyye kazâsına tâbi‘ Terkos nâhiyesinde vâki‘ yaylakda olan çoban tâ’ifesinden koyunlarının sütlerini teleme peyniri yapıp bize altışar akçe[ye] bey‘ edip biz dahi teleme peynirinden dil peyniri yapıp mahrûse-i Kostantıniyye’de bakkal tâ’ifesine on ikişer akçeye bey‘ eyleyip anlar dahi on dörder akçeye bey‘ ederler idi hâlen narh-ı pâdişâhî dahi bu minvâl üzre cârî olmuşiken işbu sene-i mübârekede iştirâ eylediğimiz teleme peynirinin semenlerini edâ ve teslîm murâd eylediğimizde zikr olunan çoban tâ’ifesini mücerred bize narh cârî olmamışdır deyû bey‘ ve teslîm eyledikleri teleme peynirinin her vakıyyesine bizden yedişer akçe taleb edip bizimle nizâ‘dan hâlî değillerdir vukūfu olan bî-garaz müslimînden suâl olunup ihbârları tahrîr olunmak matlûbumuzdur dediklerinde mahrûse-i merkūmede bakkal tâ’ifesinden Mehmed b. Abdullah ve Ali Beşe b. Mahmud ve Üveys Beşe b. Mehmed ve Muharrem Beşe b. Ahmed nâm kimesneler li ecli’l-ihbâr meclis-i şer‘-i şerîfe hâzırûn olup fi’l-hakīka zikr olunan Terkos nâhiyesinde vâki‘ yaylakda olan çoban tâ’ifesi koyunlarının sütlerini teleme peyniri yapıp mezbûrûna altışar akçeye bey‘ edegelmişler ve narh-ı pâdişâhî dahi altışar akçeyedir kadîmü’l-eyyâmdan bu âna gelince çoban tâ’ifesi yapdıkları teleme peynirini dil peyniri narhının nısfına bey‘ edegeldikleri ma‘lûmumuzdur deyû her biri peynirci tâ’ifesinin takrîrlerine muvâfık haber verdiklerinde vâki‘ü’l-hâl hıfzan li’l-makāl ketb olundu. Fi’l-yevmi’l-hâdî aşer min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Ali Beşe b. Müyesser?, Kara Mehmed Beşe b. Abdullah, Ali Beşe b. Mustafa, Hüseyin b. Ali, Ahmed b. Hüseyin, …? b. Mehmed ve gayruhüm mine’l-hâzırîn