Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 98 Hüküm no: 76 Orijinal metin no: [14b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi v. Yorgi’nin mülk menzil yerini Esteryo v. Vargo’ya sattığı Havâss-ı Kostantıniyye -hamâha’llâhu te‘âlâ ani’l-âfât ve’l-beliyye- kazâsına tâbi‘ Çatalca nâhiyesi muzâfâtından Oklağolu demekle ma‘rûf karye sükkânından Yamandi v. Yorgi nâm nasrânî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Esteryo v. Vargo nâm zimmî muvâcehesinde bi’t-tav‘ ve’r-rızâ ikrâr ve i‘tirâf edip silk-i mülkümde münselik olup karye-i mezbûrede vâki‘ iki tarafdan mezbûr Esteryo mülkü ve bir tarafdan Todor Kosta mülkü ve bir tarafdan ba‘zan yine benim mülküm ve ba‘zan tarîk-i âm ile mahdûd ve mümtâz zât-ı eşcâr-ı müsmire ve gayr-ı müsmire bahçeyi müştemil mülk menzil yerimi merkūm Esteryo’ya on üç bin cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûru’n-na‘t on üç bin akçeyi Esteryo yedinden tamâmen ahz ü kabz eyledim, ba‘de’l-yevm zikr olunan menzil yerinde alâkam kalmadı, merkūm Esteryo’nun mülk-i müşterâsıdır keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ vaka‘a bi’l-ibtigā ketb olundu. Fî 13 min Ramazâni’l-mübârek li sene 1065. Şuhûdü’l-hâl: El-Hâc Mehmed b. İbrahim, Salih Beşe b. Hasan, Ali Beşe b. Mustafa, Abdullah b. İskender, Şimo, Pavlo, Manol, Anaştaş, Yorgi, Yani, Todori, Kiryazi, Diyo Mandi, Yorgi, Eksoderki, İstemad, Papa Şolo, Gorki, Dimitri, Kosta ve gayruhüm mine’l-hâzırîn