Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 99 Hüküm no: 77 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Sofyanoz ile kardeşi Panayot’un Manastır köyündeki muhtelif mülklerini Yorgi v. Rizo’ya sattıkları, bedelin bir kısmını babalarının Yorgi’ye olan borcu ile takas ve kalanını tahsil ettikleri Vilâyet-i Rumeli’nde Yenişehir kazâsına tâbi‘ Fenar nâhiyesi muzâfâtından Manastır karyesi sükkânından olup hâlen mahrûse-i İstanbul’da bakkal tâ’ifesinden olan Yorgi v. Sofyanoz nâm zimmî kendi tarafından asâleten ve li ebeveyn er karındaşı Panayot nâm zimmî tarafında husûs-ı câ’i’z-zikre vekîl olup bimâ hüve nehcü’s-sübût şer‘an vekâleti sâbite oldukdan sonra vekâleten meclis-i şer‘-i şerîf-i lâzımü’t-teşrîfde işbu râfi‘ü’l-vesîka diğer Yorgi v. Rizo nâm zimmî muvâcehesinde asâleten ve vekâleten ikrâr ve i‘tirâf edip silk-i mülkümüzde münselik olup karye-i merkūmede vâki‘ bir tarafdan Yani mülkü ve bir tarafdan Andon mülkü ve bir tarafdan Vasilaki mülkü ve bir tarafdan tarîk-i âm ile mahdûd üç bâb fevkānî ve iki bâb tahtânî odaları ve havluyu müştemil mülk menzilimi ve kurbunda vâki‘ bir matbahımızı ve yine karye-i mezbûrede vâki‘ Karındaş Bostanı demekle ma‘rûf bir kıt‘a bostanı ve yine karye-i merkūme kurbunda vâki‘ lede’l-cîrân ma‘lûmü’l-hudûd bir kıt‘a bostanı ve yine karye-i mezbûre hudûd[u] dâhilinde mevâzi‘-i müte‘addide[de] vâki‘ her birinin hudûdu beynimizde ma‘lûm dört kıt‘a bostan yeri ki cem‘an altı kıt‘a bostanlarımızı ve yine karye-i mezbûrede Kotlani nâm mevzi‘de vâki‘ yedi dip ceviz eşcârını ve yine karye-i mezbûre sınırı dâhilinde vâki‘ inde’l-ahâlî ma‘lûmü’l-hudûd bir kıt‘a mülk çayırımızı dahi merkūm diğer Yorgi’ye bi safkatin vâhidetin yirmi bir bin beş yüz cedîd akçeye bey‘-i bâtt-ı kat‘î ile bey‘ edip ol dahi vech-i muharrer üzre iştirâ ve kabûl eyledikden sonra semeni olan mezbûru’n-na‘t yirmi bir bin beş yüz akçenin dokuz bin beş yüz akçesini mersûm Yorgi yedinden tamâmen ahz ü kabz eyleyip semen-i bâkī on iki bin akçeyi babamız mesfûr Sofyanoz’un merkūm Yorgi’ye deyni olan on iki bin akçeye takas ol dahi mukāssa ve kabûl eyledikden sonra emlâk-i mersûmeyi mahallinde zabt ve tasarrufa merkūm Yorgi’yi tarafımdan taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Ali b. Mustafa, Abdullah b. İskender, Dilâver b. Abdullah, Hüseyin Çelebi b. Ali, Nikola, Rizo, Hıristo, Mavrik, Panayot, Esteryo, Hıristo, Yorgi, Rizo, Manol ve gayruhüm