Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 264 Hüküm no: 284 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa Beşe’nin borcunun olduğunun tespiti ve ödenmesi gerektiği <>. İşbu bâ‘isü’l-kitâb Mehmed Beşe b. Süleyman ve İbrahim Beşe b. Sinan ve Halil Beşe b. Yakub nâm kimesneler meclis-i şer‘-i hatîr-i lâzımü’t-tevkīrde vilâyet-i Rumeli’nde Premedi kazâsına tâbi‘ Zavle nâm karye sükkânından iken bundan akdem vefât eden Mustafa Beşe nâm kimesnenin sulbî kebîr oğlu hasren vârisi diğer Mehmed Beşe b. Mustafa nâm kimesne mahzarında her biri üzerine da‘vâ ve takrîr-i kelâm edip müteveffâ-yı merkūm Mustafa Beşe’nin zimmetinde cihet-i deyn-i şer‘îden ikimizin beşer yüz akçe ve merhûm Halil Beşe’nin iki yüz akçe ki cem‘an bin iki yüz akçe hakkımız olup meblağ olup meblağ-ı mezbûru her birimiz kable’l-ahz ve’l-istîfâ vefât etmeğin hâlâ terekesine vâzı‘ü’l-yed olan oğlu merkūm Mehmed Beşe’den suâl olunup terekesinden alıverilmesi matlûbumuzdur dediklerinde, gıbbe’s-suâl merkūm Mehmed Beşe cevâbında müdde‘iyyûn-ı merkūmûn Mehmed Beşe ve İbrahim Beşe ve Halil Beşe meblağ-ı mezbûr bin iki yüz akçeyi babam müteveffâ-yı merkūmun hayâtında karye-i mezbûrede müceddeden binâ eylediği mescid-i şerîfin mesârif-i lâzımesine teberru‘ olmak üzre sarf eyle deyû her biri def‘ [ve] teslîm ettiklerinde ol dahi ahz u kabz ettikden sonra meblağ-ı mezbûr zikr olunan mescid-i şerîfin mesârifine emirlerine binâen sarf edip müteveffâ-yı merkūmun zimmetinde bir akçe hakları kalmadı deyicek gıbbe’s-suâl ve’l-inkâr merkūm Mehmed Beşe’den minvâl-i muharrer üzre müdde‘iyyûn-ı mezkûrûn müteveffâ-yı merkūm meblağ-ı mezbûr bin iki yüz akçeyi zikr olunan mescid-i şerîf mesârifine sarf eyle deyû verdiklerini mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka meblağ-ı mezbûru müteveffâ-yı merkūma zikri mürûr eden mescid-i şerîfin mesârifine sarf eyle deyû vermediklerine müdde‘iyyûn-ı merkūmûn Mehmed Beşe ve Halil Beşe ve İbrahim Beşe’nin her birine yemîn teklîf olundukda anlar dahi alâ vefki’l-mes’ûl half billâhi’l-aliyyi’l-a‘lâ etmeğin mûcebince meblağ-ı mezbûr bin iki yüz akçeyi müdde‘iyyûn-ı merkūmûna edâ ve teslîme merkūm Mehmed Beşe’ye tenbîh olunup mâ hüve’l-vâki‘ bi’t-taleb ketb olundu. Fi’l-yevmi aşer min Cumâdelâhire li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Hasan Çelebi b. Ahmed, Veli Beşe b. Mahmud, Baba Resul b. Rıdvan ve gayruhüm.