Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 113 Hüküm no: 98 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Mehmed’in mülk menzilini Halil Çelebi b. Mustafa’ya sattığı Medîne-i Ebâ Eyyûb el-Ensârî -âmelehu’llâhu te‘âlâ bi lütfihi’l-cârî-de Evlice Baba mahallesi sâkinlerinden Hüseyin Çelebi b. Mehmed nâm kimesne meclis-i şer‘-i şerîf-i lâzımü’t-tevkīrde işbu hâmilü’l-kitâb Halil Çelebi b. Mustafa mahzarında bi’t-tav‘ ve’r-rızâ ikrâr ve i‘tirâf edip silk-i mülk-i sahîhimde münselik olup mahalle-i merkūmede vâki‘ etrâf-ı erba‘adan el-Hâc Mehmed b. Abdülbâkī ve Nasuh Beşe b. Abdülmennân ve Mehmed Çavuş b. Mahmud mülkleri ve tarîk-i âm ile mahdûd olup iki bâb tahtânî odaları ve bir sofayı ve bir kileri ve bir fırını [ve] müşterek su kuyusunu ve havluyu ve zât-ı eşcâr-ı müsmire ve gayr-ı müsmire hadîkayı ve kenîfi müştemil olan mülk menzilimi bi cümleti’t-tevâbi‘ ve’l-levâhık ve kâffeti’l-hukūk ve’l-merâfık müşârun-ileyh Halil’e bey‘-i kat‘î ile on dokuz bin akçeye bâtten bey‘ ve teslîm ol dahi vech-i mübeyyen üzre iştirâ ve kabûl ve kabz eyledikden sonra semen-i mezbûr on dokuz bin akçeyi mersûm Halil Çelebi yedinden bi’t-tamâm ve’l-kemâl alıp kabz eyledim ba‘de’l-yevm menzi[l-i] mahdûd-ı mezkûrda benim vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye alâka ve medhalim yokdur, müşârun-ileyh Halil Çelebi’nin mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şevvâli’l-mükerrem min şuhûri sene hamsin ve sittîn ve elf. Şuhûdü’l-hâl: Şaban Efendi b. Ebîbekir el-İmâm, Mehmed Beşe b. Ali, Mahmud Beşe b. Ali, Ali Beşe b. Hasan, Ali Dede b. Ömer, Kenan b. Abdullah, el-Hâc Yusuf b. Abdullah, Abdullah Beşe b. İskender, Dilâver Beşe b. Abdullah