Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 113 Hüküm no: 97 Orijinal metin no: [18b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Çelebi b. Hüseyin’in mülk menzilini Halil Efendi b. Çakır Ağa’ya sattığı Medîne-i Ebâ Eyyûb Ensârî -aleyhi rahmetü’l-Bârî-de vâki‘ merhûm Zal Paşa Câmi‘-i şerîfi kurbunda sâkin Osman Çelebi b. Hüseyin el-Cündî nâm kimesne meclis-i şer‘-i şerîf-i lâzımü’t-tevkīrde işbu hâfizu’l-kitâb Dâr-ı hilâfeti’l-aliyye Kostantıniyyetü’l-mahmiyye’de vâki‘ Mahmud Paşa Medresesi’nin bi’l-fi‘il müderrisi olan umdetü’l-müderrisîni’l-kirâm zübdetü’l-muhakkıkīni’l-fihâm Halil Efendi necl-i el-merhûm el-Hâc Çakır Ağa mahzarında bi tav[‘i]’s-sâf ikrâr ve i‘tirâf edip medîne-i mezbûre mahallâtından Düğmecibaşı mahallesinde vâki‘ bir tarafdan merhûm Rahime Hâtun veresesi mülkleri ve bir tarafdan Düğmecizâde Vakfı ve bir tarafdan Ayni Hâtun Vakfı ve bir tarafdan tarîk-i âm ile mahdûd ve mümtâz olan hâriciye ve dâhiliyesi büyût-i müte‘addideyi muhteviye olan mülk menzilimi bi cümleti’t-tevâbi‘ ve’l-levâhık fıddî râyicü’l-vakt yüz otuz beş bin akçeye mûmâ-ileyh Halil Efendi’ye bey‘-i bâtt-ı kat‘î ile bey‘ ve teslîm ve semeni olan meblağ-ı mezbûr yüz otuz beş bin akçeyi müşârun-ileyh Halil Efendi yedinden bi’t-tamâm ve’l-kemâl ahz ü kabz [19a] edip ol dahi iştirâ ve tesellüm ve kabz eyledi ba‘de’l-yevm menzil-i mahdûd-ı mezbûr mûmâ-ileyh Halil Efendi’nin mülk-i müşterâsıdır, keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurreti Şevvâli’l-mükerrem li sene hamsin ve sittîn ve elf. Şuhûdü’l-hâl: Hâcib? ah-ı Mehmed Efendi, Mehmed Efendi b. Mahmud, Yusuf Efendi b. eş-Şeyh Ahmed, Mehmed Efendi b. Hasan el-Kadı, Hasan Bey b. Mustafa, Ali Çavuş b. Muslu, eş-Şeyh Kasım