Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 266 Hüküm no: 287 Orijinal metin no: [36b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Affan’ın evini oğlu Mehmed ve kızı Âmine’ye yarımşar hisse olarak sattığı Mahmiye-i İstanbul’da Sultan Selim kurbunda Çukur Bostan mahallesinde sâkine Âişe bt. Affan nâm hâtun meclis-i şer‘-i şerîfde kebîr oğlu Mehmed ve kebîre kızı Âmine ibney İbrahim nâm kimesneler mahzarlarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan müezzine meşrûta vakıf menzil ve bir tarafdan Zülfikār Ağa mülkü ve bir tarafdan ba‘zen Şaban mülkü ve ba‘zen Havva Kadın mülkü ve bir tarafdan bâyi‘a-i mezbûre Âişe mülkü ile mahdûd fevkānî bir oda ve tahtânî bir oda ve kenîfi ve havlu ve bir mikdâr damlalığı müştemil menzilimin nısf-ı şâyi‘ini mezbûr Mehmed’e ve nısf-ı şâyi‘-i âharını merkūme Âmine’ye bi cümleti’t-tevâbi‘ ve’l-levâhık ve kâffe-i hukūk ve’l-merâfık tarafeynden îcâb ve kabûlü hâvî bey‘-i bâtt-ı şer‘î ile mezbûrân Mehmed ve Âmine’ye nakid râyic fi’l-vakt on iki bin akçeye bey‘ ve teslîm edip mezbûrân Mehmed ve Âmine dahi minvâl-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr on iki bin akçeyi merkūmân Mehmed ve Âmine yedlerinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūmân Mehmed ve Âmine’nin mülk-i müşterâlarıdır keyfe mâ yeşâ’ ve yahtâr mutasarrıfân olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Cumâdelâhire li sene seb‘a ve seb‘în ve elf. Şuhûdü’l-hâl: Ali Efendi b. Mehmed el-İmâm, Mehmed Çelebi b. Ali el-Müezzin, Bayram Beşe b. Mehmed, Şaban Beşe b. Musli, İbrahim b. Abdullah, Şaban b. Şaban, Bekir b. Mehmed, Şükrullah Bey.