Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 266 Hüküm no: 288 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed Efendi b. Mustafa’nın Bayram Ağa b. Mustafa’ya verdiği borcu vârislerinin tahsil ettiği Hutime bi’l-hayr ve’s-sa‘âde harrerehû el-fakīru ileyhi sübhânehû ve te‘âlâ es-Seyyid Cafer b. Kemaleddin el-müvellâ hilâfeten bi medîneti Kostantıniyye el-mahmiyye ufiye anhümâ. El-emru kemâ zükire fîhi harrerehû el-fakīru ileyhi sübhânehû te‘âlâ Mehmed Sadık el-Kadı bi Dâri’s-saltanati afallâhu ani’l-beliyye Kostantıniyye el-mahmiyye -gufire lehû- Mahmiye-i İstanbul’da Çıkrıkçı Kemal mahallesinde sâkin iken bundan akdem vefât eden Mehmed Efendi b. Mustafa nâm kimesnenin verâseti sulbî kebîr oğulları Mustafa Efendi ve Ahmed b. Abdullah ve Seyyid Mehmed Çelebi ve Seyyid Hasan ve Seyyid Hüseyin’e ve sulbî sagīr oğlu İsmail’e münhasıra olup ve mezbûr Seyyid Mehmed Çelebi sagīr-i mezbûrun kıbel-i şer‘den mansûb vasîsi ve mezbûr Mustafa Efendi ve merkūmûn Ahmed ve Abdullah ve Seyyid Hasan ve Seyyid Hüseyin taraflarından husûs-ı câi’z-zikre vekîl olduğu Ahmed Çavuş b. Hasan ve mezbûr Seyyid Mehmed Çelebi şehâdetleri ile şer‘an vekâlet-i sâbit ve mütehakkik oldukdan sonra mezbûrân Mustafa Efendi ve Seyyid Mehmed Çelebi meclis-i şer‘-i hatîr-i lâzımü’t-tevkīrde işbu sâhibü’l-kitâb Bayram Ağa b. Mustafa nâm kimesne mahzarında her biri asâleten ve vekâleten ikrâr ve i‘tirâf edip bundan akdem babamız müteveffâ-yı mezbûr Mehmed Efendi hayâtında şerîfi altın üçer yüz on beşer akçeye râyic iken mezbûr Bayram Ağa’ya kırk iki bin züyûf akçe ikrâz ve teslîm ol dahi iktirâz ve yedinden kabz ve tesellüm edip ba‘dehû mezbûr Bayram Ağa kendi yediyle on sekiz bin akçe ve Mustafa Kethüdâ yediyle on üç bin yüz yirmi beş akçe cem‘an otuz bir bin yüz yirmi beş mezbûrü’n-na‘t akçesini babamız mezbûr Mehmed Efendi’ye def‘ ve teslîm ol dahi kabz ve tesellüm edip on bin sekiz yüz yetmiş beş akçesini kable’l-îfâ ve’l-istiftâ babamız mezbûr Mehmed Efendi fevt olup meblağ-ı mezbûr irsen bize intikāl etmişidi el-hâletü hâzihî ber muktezâ-yı şer‘-i mutahhar ol meblağın kıymeti olan otuz dört altın ve nısf altın için mezbûr Bayram Ağa yedinden yetmiş yedi buçuk kıt‘a esedî guruş ahz u kabz eyledik min ba‘d sâlifü’l-beyân kırk iki bin akçeden mezbûr Bayram Ağa zimmetinde bir akçe ve bir habbe bâkī kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Cumâdelâhire li sene seb‘a ve seb‘în ve elf. Şuhûdü’l-hâl: Ahmed Çavuş b. ( ) el-Mübâşir, Hacı Ahmed Çelebi Kâtib-i Dîvân-ı âlî, Abdullah Efendi İmâm-ı Câmi-i Küçük, Mehmed Efendi Kâtib-i Divân-ı âlî, Mehmed Efendi İmâm-ı mahalle-i Defterdâr, Ahmed Çelebi b. Hüseyin.