Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 121 Hüküm no: 109 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın Yani v. Polo’ya mülk menzili ile bağını sattığı, tasarrufundaki tarla hisselerinin tasarruf hakkını devrettiği Vilâyet-i Rumeli’nde Yenişehir kazâsı nevâhîsinde Kuhistân nâhiyesine tâbi‘ Palyo Kasrı nâm karye sâkinlerinden Hasan b. Abdullah nâm kimesne meclis-i şer‘-i şerîfde işbu râfi‘ü’l-vesîka Yani v. Polo nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ etrâf-ı erba‘ası İstamo ve Kara İstemad ve Rizo mülkleri ve tarîk-i âm ile mahdûd iki bâb tahtânî odaları ve zât-ı eşcâr-ı müsmire ve gayr-ı müsmire bahçeyi müştemil mülk menzilden ve yine karye-i mezbûrede Gavrili nâm mevzi‘de vâki‘ bir kıt‘a bağ ile Gorona nâm mevzi‘de vâki‘ bir kıt‘a mülk bağdan ve yine mevzi‘ayn-i mezbûreyn kurbunda vâki‘ zât-ı eşcâr-ı müsmireyi müştemil bir kıt‘a mülk bostanda olan beş sehimden bir sehim hisse-i şer‘iyye-i şâyi‘amı mezbûr Yani’ye iki bin beş yüz cedîd akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezbûre sınırı dâhilinde mevâzi‘-i mütesarrıfe vâki‘ her birinin hudûdu beynimizde ma‘lûm yirmi yedi kıt‘a tarlalarda olan beş sehimden bir sehim hisse-i şâyi‘amın dahi hakk-ı tasarruflarını ma‘rifet-i sâhib-i arz ile beş yüz akçe bedel mukābelesinde tefvîz ve ferağ eylediğimde ol dahi tefevvuz ve kabûl eyleyip semen-i mezbûr ile bedel-i mezkûr olan üç bin akçeyi merkūm Yani yedinden tamâmen ahz ü kabz eylediğimden sonra zikr olunan emlâk ve arâzide olan hisse-i şâyi‘alarımı mahallinde zabt ve tasarrufa tarafımdan mersûm Yani’yi taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene hamsin ve sittîn ve elf. Şuhûdü’l-hâl: Mehmed Efendi el-Kadı, Ahmed Çelebi el-Mukayyid, Mustafa Beşe b. Mehmed, Abdi Beşe b. İskender, Dilâver b. Abdullah, Yani, Zanyel?, Yorgi, Yani, Franko, Yorgi