Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 120 Hüküm no: 108 Orijinal metin no: [20b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdülbâki’nin Alibeyköy’deki çiftliğini müştemilâtıyla birlikte Fâtıma Sultan’a sattığı Husûs-ı câ’i’z-zikrin mahallinde ketb ü tahrîri iltimâs olunmağın küttâb-ı mahkeme-i şerîfeden umdetü’l-kuzât Mevlânâ Mehmed Efendi irsâl olunup ol dahi hilâl-i sutûrda mastûrü’l-esâmî müslimîn ile mahmiye-i Kostantıniyye hısn-ı ebvâbından Hazret-i Ebâ Eyyûb el-Ensârî Kapısı hâricinde sâkine umdetü’l-muhadderât zübdetü’l-muvakkarât tâcü’l-afâifi’l-mestûrât aliyyetü’z-zât safiyyetü’s-sıfât Âişetü’z-zamân Râbiatü’d-devrân Fâtıma Sultan -dâmet ismetuhâ- hazretlerinin sa‘âdethânelerinde akd-i meclis-i şer‘-i şerîf eyledikde yine mahmiye-i merkūme hısnı ebvâbından Cebe Ali Kapısı dâhilinde Seferikoz mahallesi sâkinelerinden Belkıs bt. Abdülbâkī nâm hâtun meclis-i ma‘kūd-ı mezkûrda işbu kitâb-ı sıhhat-nisâbın sâhibeleri Sultân-ı müşârun-ileyhâ hazretleri taraf-ı şerîflerinden şirâ-i câ’i’z-zikri tasdîke vekîl-i sâbitü’l-vekâleleri fahrü’l-eşbâh Ali Bey b. Mustafa nâm vekîl muvâcehesinde ikrâr ve i‘tirâf edip silk-i mülkümde münselik olup Havâss-ı aliyye [21a] -humiyet ani’l-beliyye- kazâsına tâbi‘ Alibeyköyü demekle ma‘rûf karye (…) bir tarafı Mustafa mülkü ve bir tarafı vâdi ve bir tarafı mîrî bahçe ve taraf-ı râbi‘i (…) ile mahdûd olup hâriciyesi bir bâb fevkānî oda ve bir kameriyye ta‘bîr olunu[r] tahtapûş ve bir tahtânî oda ve bir ahırı ve dâhiliyesi iki bâb tahtânî oda ve bir köşk ve bir fırın ve bir kenîf ve zât-ı eşcâr-ı müsmire ve gayr-ı müsmire hadîkayı ve iki dönüm bağ ve on dönüm arsa-i hâliyeyi müştemil olup çiftlik ta‘bîr olunur mülk menzilimi cümle tevâbi‘ ve levâhıkıyla Sultân-ı müşârun-ileyhâ hazretlerine tarafeynden îcâb ve kabûlü hâvî bey‘-i bâtt-ı sahîh-i şer‘î ile tâmmü’l-vezn üç yüz kıt‘a riyâlî guruş-ı kebîreye bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semen-i mezbûru yed-i şerîfelerinden tamâmen ahz ü kabz eyledim, ba‘de’l-yevm çiftlik-i mahdûd-ı mezkûrda vechen mine’l-vücûh benim alâka ve medhalim yokdur, Sultân-ı müşârun-ileyhâ hazretlerinin mülk-i müşterâları olmuşdur, keyfemâ teşâ ve tehtâr mutasarrıfe olsun dedikde mukırra-i merkūmenin vech-i mukarrer üzre cârî ve sâdır olan cemî‘ ikrârları[nı] vekîl-i mezbûr Ali Bey bi’l-muvâcehe tasdîk ve bi’l-müşâfehe tahkīk etmeğin husûs-ı mezbûru Mevlânâ-yı müşârun-ileyh mahallinde ketb ü tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene hamsin ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Mehmed Çelebi b. Osman, Ömer Çelebi b. Mustafa, Ebûbekir Beşe b. Mehmed, Hüseyin Beşe b. Abdullah, İbrahim Bey b. Yakub ve gayr